Александр Новак: “Идел буе федераль округы төбәкләрендә тулаем алганда ягу сезонына әзерлек график нигезендә алып барыла”

Идел буе федераль округы төбәкләрендә тулаем алганда ягу сезонына әзерлек график нигезендә алып барыла. “Быел бу мәсьәләгә гаять җитди игътибар бирелде”, - дип билгеләп узды Россия Федерациясе Энергетика министры Александр Новак, Татарстан Хөкүмәт йортында узган ИФО на караучы электроэнергетика объектларының 2012/2013 нче елгы көзге-кышкы чорга әзерлеге мәсьәләләренә багышланган киңәшмә тәмамлангач. Киңәшмәдә ТР Президенты Рөстәм Миңнеханов катнашты.

“Быел без субъект җитәкчеләре, челтәр һәм генерация компанияләре җитәкчеләре катнашында һәр федераль округта мондый киңәшмәләр уздырабыз. Кышка сыйфатлы әзерлек өчен җирлек тудыручы барлык позицияләрне тикшерәбез. ИФО да тулаем алганда барысы да план буенча бара. Беренче чиратта без ягулыкның норматив запаслары белән тәэминатны кайгыртабыз, генерация объектлары алар белән тулысынча тәэмин ителгән булырга тиеш, шулай ук муниципаль берәмлекләрдә объектларда тикшерү процедуралары, регламентлар үтәлешенә, шул исәптән, ягу сезонына әзер булырга тиешле объектларны кулланылышка кертүгә һәм планлы ремонт эшләренә игътибар юнәлтәбез”, - дип ассызыклый А. Новак. Аның әйтүенчә, Татарстан, Түбән Новгород өлкәсе, Башкортостан төбәкләре – алдынгылар сафында, Саратов, Самара өлкәләре берникадәр калыша. “Дөрес, аларда да вәзгыять бик киеренке дип әйтеп булмый, тик ягулык резервлары белән тәэминат нормативларын билгеләүгә кагылышлы кайбер сорауларга без әлегә җавап ишетмәдек”, - ди министр.

ИФО буенча бүгенге көндә күмер рәвешендәге ягулык запасы 215 процент, мазут буенча 154 процент дәрәҗәсендә. “Бу запасның тотрыклылыгын сакларга кирәк, чөнки ягу сезоны башына ихтыяҗ бүгенгә караганда күпкә югарырак булачак. Тулаем алганда без вәзгыятьне кулда тотабыз, барлык планлаштырылган чаралар гамәлгә ашуына һәм объектларның кышка әзер булачагына ышанычым зур”, - дип белдерде РФ Энергетика министры.

Александр Новак сүзләренчә, Идел буе федераль округында түләүсезлек белән вәзгыять башка федераль округларга караганда яхшырак. “Минем мәгълүмат буенча биредә бурычның гомуми күләме 1,74 миллиард сумны тәшкил итә. Бу башка федераль округларга караганда күпкә түбәнрәк. Бу бурыч күләме артмас дип ышанам һәм бу беренче чиратта РФ Энергетика министрлыгына бәйле түгел, бу урыннардагы җитәкчеләрдән, компания башлыкларыннан тора. Калыплашкан мәсьәләләр күзлегеннән чыгып караганда, без бүген РФ Хөкүмәтендә каралучы билгеле тәкъдимнәр әзерләдек”, - диде министр. Ул билгеләп үткәнчә, аерым алганда, түләмәү өчен кырысрак җәзалау, административ җаваплылыкны җинаять җәзасына кадәр көчәйтү күздә тотыла. “Җинаять җаваплылыгы мәсәләсе әлегә хупланмады. Административ чараларга килгәндә, бу мәсьәлә турында инде килешенгән һәм без законнар җыелмасына үзгәрешләр кертәчәкбез”, - дип шәрехләде А. Новак.

Бүгенге киңәшмә барышында билгеле булганча, 1 сентябрьгә кадәр башкарма хакимият органнары тарафыннан электроэнергетика объектларын тикшерү буенча комиссияләр булдырылырга тиеш. 10 нчы сентябрьгә кадәр һәр объект тикшерү турында хәбәрдар булырга тиеш. Төп бурычлар турында сөйләгәндә, 15 ноябрьгә кадәр тикшерүләрне төгәлләргә дигән максат куела.