А.М.Горький исемендәге Яшел Үзән заводында кече ракеталы корабка нигез салу тантанасында катнашты

Бүген “Ак Барс” холдингы педприятиеләре төркеменә керә торган А.М.Горький исемендәге Яшел Үзән заводында ике әһәмиятле вакыйга – “Яшел Үзән” кече ракета корабле корпусына нигез салу һәм металлны плазма белән кисә торган портал җайламасын эшләтеп җибәрү булды.

Чараларда ТР Премьер-министры Илдар Халиков катнашты.

“А.М.Горький исемендәге Яшел Үзән заводы” ААҖ генераль директоры Ренат Мистахов сөйләвенчә, металлны плазма белән кисү машинасы эш башкаруны 3-3,5 тапкырга тизләтәчәк, һәм бу цехта модернизацияләү эшенең башы гына. Ренат Мистахов сүзләренчә, ул заводка, завод алдына куелган бурычларны сыйфатлы итеп һәм вакытында башкаруын раслый алсын өчен, кирәк, ә заводның заказлары 2018 нче елга кадәр бар.

Республика Хөкүмәте башлыгы Илдар Халиков завод эшчеләрен иң яхшы дөнья стандартларына туры килә торган яңа җайланманы эшләтеп җибәрү белән котлады. “Мин машина төзүчесе буларак, дөнья заводларында кулланыла торган технологияләрдән ерак торган иң яхшы дөнья үрнәкләренә күчүче кешеләр өчен шатланам, - дип билгеләде Татарстан Премьер-министры. – Бик күп еллар элек төзелгән цех үзенең җиһазландырылуы, эш өчен уңайлыклары белән безнең ил машина төзелешенең иң яхшы үрнәгенә әйләнә”.

Илдар Халиков Татарстан Республикасы Көне алдыннан яңа җайланманың эшләтеп җибәрелүенә шатлануын әйтте, шулай ук Татарстанга килгән завод судноларына төп заказ бирүче Каспий флотилиясе вәкилләренә рәхмәтен белдерде.