Торак төзелеше үсешенә теләктәшлек итү фонды Татарстанга социаль проектларны тормышка ашыруга җир кишәрлекләрен бирәчәк

Бүген ТР Хөкүмәте Йортында Татарстанның Торак төзелеше үсешенә ярдәм итү федераль фонды белән багланышлары турында киңәшмә үтте. ТР һәм Фонд арасында хезмәттәшлек турында килешү 2009 нчы елда кабул ителгән иде. Киңәшмә эшендә ТР Президенты Рөстәм Миңнеханов һәм Торак төзелешенә ярдәм итү фонды генераль директоры Александр Браверман катнашты.

Киңәшмәдә, аерым алганда, Республика клиник хастаханәсе инфраструктурасын киңәйтү, сәламәтлек саклау хезмәткәрләренә торак төзелеше, шулай ук эконом-класслы торак төзелеше, шул исәптән, күп балалы гаиләләр өчен аз катлы йортлар төзү турында мәсьәләләр каралды. Моннан тыш, җир кишәрлекләрен җәлеп итүнең һәм проектларны тормышка ашыруның беренче планына кул куелды.

Торак төзелеше үсешенә ярдәм итү фонды ТРга төзелеш өчен булган җирләрен бирергә риза.

Рөстәм Миңнеханов сүзләренчә, берничә проект инде октябрьдә эшләтеп җибәрелергә тиеш.

"Фонд нәтиҗәле һәм бик профессиональ эшли. Ул безгә проблемалы урыннарны чишәргә мөмкинлек бирә", - диде ТР Президенты.

Александр Браверман хәзер Фондның торак төзелеше буенча 80нән артык проекты булуын әйтте. Алар РФнең 35 субъектын колачлый һәм күбесенчә аз катлы төзелешкә юнәлдерелгән.

"Без Владивостоктан алып, Калининградка кадәр үз проектларыбызны тормышка ашырабыз, ләкин Татарстан - безнең өчен приоритет. Безнең монда билгеле бер уңай һәм зур проектларны тормышка ашыру өчен нигезләр бар. Без проектлар тормышка ашырылачак һәм кешеләр көткәннәрен алачак, дип ышанабыз. Без перспективалары югары дип бәялибез", - дип ассызыклады ул.

Торак Фонды җирләрендә төзелеш бәяләре уртача базарныкыннан 7-15 процентка түбәнрәк. Торак Фонды торак төзелеше максатларында территорияләрне үзләштерү проектларын тормышка ашыручы төзүчеләргә ярдәм итә.

Торак төзелеше үсешенә ярдәм итү фонды эшчәнлегенең төп приоритеты - Россиядә һәркем ала ала торган торак төзелеше өчен шартлар тудыру. Фонд алдына кулланылмый торган яки дөрес максатларда кулланылмый торган федераль җирләрне икътисади класслы торак (аз катлы) төзү өчен, федераль җирләрне кулланылышка кертү максаты куелган.

Бу максатларга ирешү өчен фонд ике бурычны хәл итә. Беренче - максатчан рәвештә мондый җирләрне эзли һәм кирәкле күләмдә җир кишәрлекләрен кулланылышка кертә. Икенчесе - төзелеш материалларын җитештерү үсешенә ярдәм итә, приоритетлардан чыгып - энергия нәтиҗәлелегенә һәм аларның экологик чисталыгына.