Быел капиталь ремонт эшләре алып барылган мәктәпләрнең барысы да 1 сентябрьдә ишекләрен ача

Быел Татарстанда капиталь ремонт программасына кертелгән барлык мәктәпләр уку елын үз вакытында -1 сентябрьдә башлап җибәрәчәк. Дөрес, эшләр тәмамланып бетмәгән кайбер мәктәпләрдә төзекләндерү уку процессы белән параллель дәвам итәчәк. Бүген ТР Хөкүмәт йортында Президент Рөстәм Миңнеханов рәислегендә узган республика киңәшмәсендә төзелеш, архитектура һәм торак-коммуналь хуҗалык министры Ирек Фәйзуллин шулай дип хисап тотты. Аның сүзләренә караганда, мәктәптә дәвам итәчәк төзекләндерү эшләре уку процессына комачаулык тудырмаса да, аны оператив башкару мөһим. Программага өстәмә рәвештә кертелгән ике белем йортында - Югары Ослан районындагы Килди урта гомумбелем бирү мәктәбендә спорт залының түбәсен алмаштыру эшләрен 20 сентябрьгә, ә Казандагы 134 нче урта гомумбелембирү мәктәбендә спортзалны ремонтлауны 30 сентябрьгә тәмамлау бурычы куелган.

Коррецион мәктәпләрдә дә комплекслы ремонт эшләрен 1 сентябрьгә тәмамлау бурычы куелган иде. Алар да, эшләр тәмамланып җитмәүгә карамастан, 1 сентябрьдә балаларны кабул итәчәк. Бүгенге киңәшмәдә Баш инвестиция-төзелеш идарәсе җитәкчесе Рәшит Нуруллин җиткергәнчә, Казандагы 4 коррекцион мәктәптә графиктан калышу күзәтелә. Иң зур борчу тудырганы - Ласточкина исемендәге махсус интернат мәктәп. Биредә башкарылган эшләрнең күләме 80 проценттан артыграк кына. Баш инвестиция-төзелеш идарәсе җитәкчесе аңлатуынча, графиктан калышу коррекцион мәктәпләрдә, гадәти мәктәпләрдән аермалы буларак, ремонтның 6 эш төре буенча гына түгел, комплекслы алып барылуы белән дә бәйле. Өстәвенә, эшкә дә соңрак керешкәннәр. Хәзер калган эшләр, нигездә, фасадларны, остаханәләрне һ.б. ярдәмче биналарны төзекләндерүгә кагыла.

ТР Президенты Рөстәм Миңнеханов коррекцион мәктәпләрдә алып барылган эшләрдән канәгать булмавын белдерде. Ул мондый хәлләр чыкмасын өчен тагын бер кат әзерлек чараларын алдан күрергә чакырды. Президент ассызыклаганча, инде хәзердән үк киләсе елда төзекләндереләчәк мәктәпләр исемлеген билгеләргә, киләсе елда башкарылачак эшләрне проектлауны да быел башларга кирәк. Бу күпфатирлы торак йортларны ремонтлау программасына да кагыла. “Киләсе елда яңа мәктәпләр төземибез, ремонт таләп ителгәннәрен төзекләндерәчәкбез.Күләме быелгыдан ким булмаячак”, - ди республика башлыгы. Ул Баш инвестиция-төзелеш идарәсен, Төзелеш, архитектура һәм торак-коммуналь хуҗалык министрлыгын әзерлек эшләрендә активлык күрсәтергә чакырды.