Рөстәм Миңнеханов ТРның Питрәч районында боз сарае ачылышында катнашты

Бүген ТРның Питрәч районында “Питрәч-арена” боз сараеның тантаналы ачылышы булды. Спорт объекты ачылышында ТР Президенты Рөстәм Миңнеханов, статс-секретарь – РФ спорт министры урынбасары Наталья Паршикова, ТР яшьләр эшләре, спорт һәм туризм министры Рафис Борһанов һ.б. катнашты.

Рөстәм Миңнеханов үзенең сәламләү сүзендә барлык район халкын боз сарае ачылышы белән котлады һәм ТР өчен бу 36 нчы боз сарае булуын билгеләде. “Илнең бер генә субъектында да моның кадәр боз сарайлары юк. Һәм бу модага иярү түгел. Без республика халкының актив рәвештә спорт белән шөгыльләнүен телибез”, - дип билгеләде ТР Президенты.

Аның фикеренчә, Татарстанда хоккейны аеруча яраталар. Моңа “Ак Барс” һәм “Нефтехимик” хоккей командаларының уңышлары дәлил булып тора. Шулай ук Рөстәм Миңнеханов, спортсменнар югары нәтиҗәләргә ирешсен өчен, сарай иртәдән кичкә кадәр эшләячәк, дип ассызыклады.

ТР Питрәч районы башлыгы Шәйхулла Насыйбуллин көннән-көн район торак пунктларының тышкы кыяфәте үзгәреп торуын билгеләде. “Хәзер җәйге эсседә дә безнең спортсменнар бозда уйный һәм әзерләнә ала”, - дип сөенде район башлыгы.

Наталья Паршикова шулай ук үз чыгышында Татарстанның гына шуның кадәр боз сарае булуын ассызыклады. “Юкка гына түгел “Ак Барс” командасы - Россиянең алдынгы командаларының берсе. Бәлки, бу аренада әзерләнә торган яшьләр киләчәктә “Ак Барс” өчен уйнаячак”, - диде Н.Паршикова.

ТР Президенты, спорт инвентарен алу өчен, боз сараена 10 мең сумлык сертификат тапшырды.

Шулай ук республика башлыгы бүген ТРның Питрәч районында җирле “Ак Барс” кошчылык комплексы” ҖЧҖдә, бройлер чебиләрен үрчетү буенча №4 нче цехта булды. “Ак Барс” кошчылык комплексы” ҖЧҖ генераль директоры Илһам Кәшәпов билгеләвенчә, бүгенге көндә 14 кош оясыннан 10сы сафка бастырылган. Тагын дүртесе сентябрьдә эшли башлаячак. Бу мәйданда елына якынча 7 мең тонна ит җитештерү планлаштырыла.

ТРның Питрәч районындагы сәфәре соңында Рөстәм Миңнеханов №2 нче урта белем бирү мәктәбендә булды, ул анда капиталь төзекләндерүдән соң уку-укыту бүлмәләрен карады, укытучылар һәм укучылар белән аралашты, шулай ук мәктәпкә, интерактив комплекс алу өчен, сертификат тапшырды.