Рөстәм Миңнеханов IT-лицейны ачу тантанасында катнашты

Бүген Татарстан башкаласында Казан федераль университетының IT-лицее ачылды. Лицей-интернатны ачу тантанасында Татарстан Президенты Рөстәм Миңнеханов, статс-секретарь – РФ спорт министры урынбасары Наталья Паршикова, ТР мәгариф һәм фән министры Альберт Гыйльметдинов, вице-премьер – ТР мәгълүматлаштыру һәм элемтә министры Роман Шәйхетдинов, Казан мэры Илсур Метшин һ.б. рәсми затлар катнашты.

“Безгә сүзләр белән түгел, ә эш белән балаларның көндәшлелеккә сәләтле, иң яхшылар булуын теләвебезне белдерергә кирәк. Татарстанда IT-кластер булдыру бурычын хәл итү кысаларында лицей ачу идеясе туды. Без тиз генә аны гамәлгә ашырдык”, дип билгеләп үтте Татарстан Президенты, аны сәхнәгә алып баручы-робот чакырган иде.

“Лицейны тәмамлаучылар арасында галимнәр, биснесменнар барлыкка килү белән горурланыр вакыт җитәр, - дип мөрәҗәгать итте укучыларга Рөстәм Миңнеханов. – Сез уңышка ирешсен өчен без барысын да эшләргә тырышачакбыз”. ТР Президенты лицейга җиһазлар алу өчен 45,5 млн. сумлык җиһаз бүләк итте.

“Бүген сез КФУ коллективына кушыласыз, котлыйм”, - дип мөрәҗәгать итте лицеистларга КФУ ректоры Илшат Гафуров. Дәресне “Казан 2013” Башкарма дирекциясе” коммерцияле булмаган автоном оешма генераль директоры Владимир Леонов, Россия җыелма командасы һәм Казанның “Динамо” командасы волейболчысы Екатерина Гамова алып барды.

IT-лицей Универсиада авылында урнашкан, ул уку һәм интернат бинасыннан торган комплекс. Мәктәпнең гомуми мәйданы 11240 кв.м.

IT-лицей-интернатның директоры Ирек Фәтхетдинов (27 яшь, “математик” белгечлеге буенча КДУ тәмамлаган, программист, Казан Идел буе районы 19 нчы гимназия директорының уку буенча урынбасары булып эшләгән) “Татар-информ” агентлыгы хәбәрчесенә белдерүенчә, лицейда 144 малай укыячак. Аларның 140 ы татарстанлы (40 ка якыны –казанлы), 4се Чабаксардан килгән. Гомумән интернат 300 укучыга исәпләнгән, быел 7 һәм 8 сыйныфларны гына җыйганнар. Лицейда 7-11 сыйныф укучылары белем алачак.

Лицей директоры сүзләренә караганда, укучыларны 3 этап буенча сайлап алганнар. Беренче этапта КФУ сайтында 11 мең кеше онлайн-тест узган. “Аннары без зоналар, районнар буенча сайладык һәм алар янына бардык. Укучылар математика, логика һәм сайлау буенча физика яки рус теленнән тест сорауларына җавап бирде. Тест буенча иң яхшы нәтиҗәләргә ирешкән балаларны өченче турга чакырдык. Балалар өч көн дәвамында университет базасында укыдылар, биредә яшәделәр һәм ашадылар. Бу өч көн буенча балаларның никадәр дәрәҗәдә IT-лицейдагы формада укырга әзер булуларын билгеләдек”, - диде ул.

Лицей тәмамлаучылар БДИ нда югары баллар җыйган очракта, аларны укырга алу белән КФУ кызыксыначак, дип белдерде Ирек Фәтхуллин. Аның сүзләренә караганда, шуның өчен лицейны тәмамлаучыларга КФУ га кергәндә ташламалар каралмаган. “Лицейда беренче елда ук КФУ профессорлары да белем бирәчәк, - дип ассызыклады ул. – Алар укучыларны фәнни-тикшеренү эшчәнлегенә актив җәлеп итәчәк”. Алар мәҗбүри рәвештә рус, татар, инглиз телен укыячак һәм сайлау буенча кытай, француз, алман һ.б. телләрне өйрәнәчәк.

Мәктәп концепциясендә барлык балалар да интернатта яши дип каралган. Алар 6 көн укыячак, ә шимбә кич ата-аналар балаларны дүшәмбе иртәсенә кадәр лицейга китерү шарты белән алып китә ала.

Укучылар 8.00 сәгатьтән 14.30 сәгатькә кадәр укыячак. Аннары балалар бераз ял иткәч, укудан тыш эшчәнлек башлана. Балаларга махсус курслар тәкъдим ителә, алар ким дигәндә икене сайларга тиеш. Әмма, гадәттә, лицеистлар 10 курсның 8-9 ын сайлый. Һәр сыйныфта 12 укучы белем алачак. Шулай ук сәхнә сәнгате, ораторлык осталыгы һ.б. буенча дәресләр каралган. Атнага ким дигәндә 4 тапкыр Универсиада объектлары базасында спорт белән шөгыльләнү каралган.