Рөстәм Миңнеханов: “Татарстанда IT-университет төзү өчен барлык ресурслар җәлеп ителәчәк”

Татарстанда “Иннополис” иярчен инновацияле шәһәре төзелеше проекты кысаларында заманча IT-университет төзүгә барлык ресурслар җәлеп ителәчәк. Бүген Питтсбургта (АКШ) Карнеги Меллон университеты (Carnegie Mellon University) вәкилләре белән очрашуда Татарстан Президенты Рөстәм Миңнеханов шулай дип белдерде. Очрашуда iCarnegie директоры Гил Таран, iCarnegie ның хәйриячелек буенча директоры Майкл Штайнер һ.б. катнашты.

Очрашуда Россия һәм Татарстанны РФ элемтә һәм массакүләм коммуникацияләр министры урынбасары Марк Шмулевич, ТР Премьер-министры урынбасары-мәгълүматлаштыру һәм элемтә министры Роман Шәйхетдинов, Казан федераль университеты ректоры Илшат Гафуров һ.б. тәкъдим итте.

Инде хәбәр ителгәнчә, бу көннәрдә Рөстәм Миңнеханов Питтсбургта эш сәфәрендә. Сәфәрнең максаты – Карнеги Меллон Университеты эшчәнлеге һәм аның тикшеренү үзәкләре белән танышу.

Университетның IT-бүлекчәсе - iCarnegie “Иннополис” иярчен инновацияле шәһәре проекты кысаларында IT-университет төзүдә Татарстанның партнеры. Бүген Татарстан Республикасы белән iCarnegie арасында үзара аңлашу турындагы меморандум да имзаланды.

Рөстәм Миңнеханов очрашуда билгеләп узганча, бу–федераль масштабтагы проект. “ Бер төбәк көче белән генәә мондый проектны гамәлгә ашыруның кыен икәнен аңларга тиешбез. Россия Элемтә һәм массакүләм коммуникацияләр министрлыгы ягыннан да ярдәм кирәк”, - диде ул. Татарстан Президенты әлеге проект кысаларында катлаулы эшкә республиканың әзер булуын белдерде. Иң мөһиме: аның белән җитди кызыксыну бар, ди ул.

“Без Карнеги Меллон университеты тәҗрибәсен файдаланырга һәм алга куелган максатка таба хәрәкәт итәргә әзер”, - ди ТР Презтденты.

iCarnegie директоры Гил Таран, үз чиратында, Татарстан партнерларының үзара мөнәсәбәтләрне үстерүгә омтылуын бәяләвен белдерде. “Быел июль аенда Казанга сәфәр барышында сезнең мөмкинлекләрне бәяләдек, бүген проектны гамәлгә ашыру шартларында көчләрне тупларга кирәк”, - диде ул.

Гил Таран шулай ук Татарстан делегациясенең Питтсбургка визитын булачак проектка, заманча технологияләрне бергәләп файдалануга бер адым дип бәяли.

Карнеги Меллон университеты белән хезмәттәшлек IT өлкәдә мөгаллимнәрне әзерләү һәм яңадан әзерләү, белем бирү программаларын файдалану һәм эшләүне, тикшеренүләр өлкәсендәге хезмәттәшлекне күздә тота.