Минтимер Шәймиев Рәшид Сүнәев белән очрашты

Бүген ТР Дәүләт Киңәшчесе Минтимер Шәймиев танылган астрофизик, академик Рәшид Сүнәев белән очрашты.

Рәшид Сүнәев 4-7 нче сентябрьдә Казанда аның теләге белән оештырылган “Рентген һава: йолдызлардан һәм кара тишекләрдән алып, космологиягә кадәр” халыкара конференциясендә катнашты.

Сөйләшү алдыннан ул очрашуга чакырганы өчен Минтимер Шәймиевка рәхмәтен белдерде. “Сезне бик тә күрәсем һәм Сезнең Болгарда, Зөядә Татарстанның тарихи һәм мәдәни һәйкәлләрен торгызу буенча башкарган эшегездә уңышлар телисе килгән иде”, - диде ул.

Рәшид Сүнәев ике атна элек Болгарда булып, күргәннәрдән, бигрәк тә Ак мәчеттән соклану хисләре кичергән улыннан һәм оныгыннан проект турында бик күп ишеткән булуын билгеләп үтте. Ул шулай ук Минтимер Шәймиевка, әлеге мәчетне һәм башка уникаль һәйкәлләрне күрер өчен, якын арада борынгы Болгар шәһәренә килергә ниятләвен хәбәр итте.

Минтимер Шәймиев галимне Болгарда һәм Зөядә барган торгызу һәм реставрация эшләренең барышы белән таныштырды, күптән түгел Алтай крае һәм Алтай Республикасына булган сәфәреннән фикерләре белән уртаклашты.

Минтимер Шәймиев һәм Рәшид Сүнәев кешелекнең тарихи һәм мәдәни мирасын саклау эшендә актуаль мәсьәләләр һәм рухи, материаль мирасны кайтару процессында фәннең һәм фәнни тикшеренүләрнең роле турында сөйләштеләр.

Очрашуда ТР Фәннәр академиясе президенты Әхмәт Мәзһәров та катнашты.