Казанда Монополиягә каршы федераль хезмәтнең беренче уку-методик үзәге ачылды

Бүген Казанда Монополиягә каршы федераль хезмәтнең “Уку-методик үзәге” Дәүләт автоном федераль учреждениесе ачылды. Бу тантанада Монополиягә каршы федераль хезмәтнең җитәкчесе Игорь Артемьев һәм Татарстан Президенты Рөстәм Миңнеханов катнашты.

Үзәк безнең илдә көндәшлелек үсешен стимуллаштыру, бизнес мөмкинлекләрен киңәйтү, монополиягә каршы органнар өчен квалификацияле кадрлар әзерләүгә юнәлдерелгән.

“Бү безнең өчен зур бәйрәм - Монополиягә каршы федераль хезмәтнең беренче уку-методик үзәген әзерләү буенча зур эшләр төгәлләнә”, - диде Игорь Артемьев. Ул ТР Президентына һәм республика Хөкүмәтенә бу проектны гамәлгә куярга ярдәм итүләре өчен рәхмәт белдерде. “Бу үзәкне нәкъ менә Казанда ачу Рөстәм Миңнеханов идеясе. Без күптән бу хакта хыялландык, бүген шатлыклы вакыйганы бәйрәм итәр өчен бергәләп тырыштык”, - дип билгеләп үтте Монополиягә каршы федераль хезмәтнең җитәкчесе.

Бүген 2 ел элек төзелгән килешүгә нәтиҗә ясала, дип билгеләп үтте Рөстәм Миңнеханов. “Бу үзәк монополиягә каршы хезмәтнең барлык хезмәткәрләренә, БДБ илләрендәге хезмәттәшләр һәм чит ил партнерларына хезмәт итәргә тиеш”, - дип билгеләп үтте ТР Президенты. Ул Монополиягә каршы федераль хезмәт, Татарстан вәкилләренә һәм төзүчеләргә бу үзәкне ачуда ярдәм иткәннәре өчен рәхмәт белдерде. “Үзәккә ихтыяҗ булсын өчен тырышу – безнең төп бурыч”, - дип ассызыклады республика башлыгы.

Монополиягә каршы федераль хезмәтнең беренче уку-методик үзәгендә 328 урынга актлар залы, 26 кешегә исәпләнгән конференция залы, 9 класс, 2 компьютер классы, 1 лингафон кабинет, китапханә, матбугат үзәге, типография, 50 кешелек кунакханә һ.б. урнашкан.

Монополиягә каршы федераль хезмәтнең беренче уку-методик үзәге мәйданында уку чараларыннан тыш конференция, семинар, халыкара дәрәҗәдә киңәшмәләр оештыру ниятләнә.