Рөстәм Миңнеханов: “Федераль хакимиятләр АИРРга җитди якын килергә тиеш”

Россия Инновацион төбәкләре ассоциациясе, РФ субъектлары үзара тәҗрибә алмашсын һәм кызыксынуларын бергәләп алга җибәрсен өчен, нәтиҗәле оешма булып тора. Шундый фикерне бүген Новосибирскида “Интерра-2012” халыкара инновацион форумында (аны оештыручыларның берсе - АИРР) ТР Президенты Рөстәм Миңнеханов белдерде.

ТР Президенты журналистлар белән әңгәмәсендә илнең алдынгы фәнни үзәкләренең берсендә - Новосибирскида үткәрелә торган “Интерра-2012” форумы очрашулар һәм инновацион өлкәдә төбәкара элемәтләрне җайга салу мәйданы булуын билгеләде.

“Миңа, Республика җитәкчесе һәм Россия Инновацион төбәкләре ассоциациясе Советы рәисе буларак, монда, бу форумда булу зур хөрмәт, - дип белдерде Рөстәм Миңнеханов. – Бүген бик кызыклы утырыш булды, ләкин мин эшлекле сәфәр кысаларында тагын күп кенә кызыклы элемтәләр булыр, дип өметләнәм”.

Рөстәм Миңнеханов сүзләренчә, Ассоциациядә катнашучы һәрбер регион аннан файда ала. “Төбәкләрдә кызыклы эшләр башкарыла, ләкин бу хакта без бик аз беләбез. Һәрбер төбәкнең үз конкурентлык өстенлекләре, билгеле бер тәҗрибә бар, һәм без Ассоциация кысаларында алар белән алмаша алабыз”, - дип саный Р.Миңнеханов.

Ул Ассоциациянең инвестицион сәясәт мәсьәләләрендә федераль институтлар белән тыгыз хезмәттәшлек итүен искәртте.

“Беркем дә безне берләшергә этәрмәде – без үзебез моңа килдек. Һәм мин хакимиятнең федераль органнары безнең идеягә җитди якын килергә тиеш, дип саныйм”, - дип тәгаен ышанып әйтте Рөстәм Миңнеханов.

ТР Президенты Новосибирскида шулай ук Россия Инновацион төбәкләре ассоциациясе комитетлары җитәкчеләре утырышын уздырды. Утырыш вакытында комитетларның эшчәнлек нәтиҗәләре турында сөйләшенде, якын айларга планнар һәм бурычлар билгеләнде.