Рөстәм Миңнеханов Мәскәүдә Татарстан Республикасы дәүләт бүләкләре тапшырды

Бүген Мәкәүдә ТР ның РФ дәге Тулы вәкаләтле вәкиллегендә Татарстан Республикасы Президенты Рөстәм Миңнеханов Татарстан Республикасы дәүләт бүләкләре тапшырды. “Бүген Татарстаннан читтә дә республика үсешенә, димәк, гомумән ил үсешенә зур өлеш керткән кешеләргә бүләкләр тапшырабыз. Киләчәктә дә бергәләп Россия халкы өчен хезмәт куярбыз дип ышанам”, - диде Рөстәм Миңнеханов бүләкләү тантанасы алдыннан.

“Нефть фәнни-эзләнү һәм проект институты” ААҖ техник директоры Владимир Шуверов, ТР нефть эшкәтү һәм нефть химиясе сәнәгате үсешенә шәхсән өлеш керткән һәм күпьеллык нәтиҗәле хезмәте өчен, “Татарстан Республикасы алдындагы хезмәтләре өчен” ордены белән бүләкләнде.

Россия Икътисад үсеше министрлыгының Дәүләт максатчан программалары департаменты директоры Юрий Колочков, дәүләт инвестицион сәясәте үсешенә, максатчан һәм адреслы инвестицион программаларны югары дәрәҗәдә гамәлгә куюга зур өлеш керткән өчен, “Фидакарь хезмәте өчен” медале белән бүләкләнде.

Татарстан Президенты Экология, технология һәм атом күзәтчелеге федераль хезмәте җитәкчесе урынбасары Светлана Радионовага “Фидакарь хезмәте өчен” медален тапшырды.

Ш.Мәрҗани исемендәге Фәнни һәм мәдәни программаларны үстерү фонды президенты Рөстәм Сөләймановка, татар халкының мәдәни традицияләрен саклауга һәм үстерүгә сизелерлек өлеш керткәне өчен, Татарстан Республикасы Президенты Рәхмәт хаты тапшырылды.

Бүләкләү тантанасында шулай ук ТР ның РФ дәге тулы вәкаләтле вәкиле Равил Әхмәтшин һәм ТР төзелеш, архитектура һәм торак-коммуналь хуҗалык министры Ирек Фәйзуллин да катнашты.