Илдар Халиков Бөтенроссия инвалидлар җәмгыяте рәисе Александр Ломакин-Румянцев белән очрашты

Бүген ТР Премьер-министры Илдар Халиков РФ Федераль Җыенының Дәүләт Думасы депутаты, РФ Дәүләт Думасының Хезмәт һәм социаль сәясәт комитеты вәкиле, Бөтенроссия инвалидлар җәмгыяте рәисе Александр Ломакин-Румянцев белән очрашты.

Очрашу ТР Хөкүмәт Йортында үтте, анда ТР Министрлар Кабинеты Аппаратының социаль үсеш идарәсе башлыгы Илдар Бәдриев катнашты, дип хәбәр итә ТР Президенты матбугат хезмәте.

Яклар ТРда “Һәркемгә уңайлы мохит” программасын тормышка ашыру мәсьәләсе, мөмкинлекләре чикләнгән затларны укыту һәм мәшгульлек мәсьәләләре, Россиядә инвалидларны социаль яклау турында РФ законын үтәү мәсьәләләре турында сөйләштеләр.

Исегезгә төшерик, Александр Ломакин-Румянцев - “Һәркемгә уңайлы мохит” дәүләт программасы: пилот төбәкләрнең тәҗрибәсе һәм Россиядә тоткарлыксыз тирәлек булдыру перспективасы” Бөтенроссия конференциясендә катнашу өчен, Казанда (Казан, "Гранд Отель”, 2012 нче елның 17 сентябре).

Конференция Бөтенроссия инвалидлар җәмгыяте тарафыннан уздырыла, аның бурычы – РФ төбәкләрендә, барыннан да бигрәк, ТРда, инвалидлар һәм мөмкинлекләре чикләнгән кешеләр өчен уңайлы мохит булдыру тәҗрибәсе белән таныштыру. ТР 2011-2015 нче елларга “Һәркемгә уңайлы мохит” РФ дәүләт программасын тормышка ашыру кысаларында пилот төбәк булып тора.

Моннан тыш, 18-20 нче сентябрьдә “Тиз хәрәкәт итә алмаучы халык төркемнәре өчен уңайлы объектлар мониторингын уздыру” төбәкара уку-укыту семинары планлаштырылган.