Рөстәм Миңнеханов “Авыл клублары” программасы хакында: “Әйдәгез, яхшырак эшлик”

22 сентябрьгә булган мәгълүматларга караганда, заказчы һәм подрядчыларның җайга салыган эше нәтиҗәсендә авыл клублары төзелеше буенча 16 объектта төзелеш-монтажлау эшләре тәмамланган, башкарма комитетлар объектларны файдалануга тапшыруга рөхсәт биргән. Әмма Татарстанда 2 атнада авыл клублары төзелешендә бары тик аз гына алга китеш булган районнар бар. Бу хакта ТР Хөкүмәт йортында торак тапшыру буенча узган киңәшмәдә белдерелде.

Киңәшмә Татарстан Президенты Рөстәм Миңнеханов рәислегендә видеоконференция режимында уза. Утырышта ТР Премьер-министры Илдар Халиков катнаша.

ТР Министрлар Кабинеты Аппаратының Төзелеш идарәсе җитәкчесе Илдар Сибгатуллин 2 атна элек узган киңәшмәдә авыл клублары төзелешен катгый контрольгә алу турында сөйләштек дип белдерде. Аның сүзләренә караганда, бу 2 атнада билгеле уңай алга китеш бар. “Кызганычка каршы, Казан шәһәре, Мамадыш, Алабуга, Апас, Яшел Үзән районнарында уңай үзгәреш аз”, - дип борчылуын белдерде докладчы.

ТР төзелеш, архитектура һәм торак-коммуналь хуҗалык министры Ирек Фәйзуллин Яшел Үзән районында объект план буенча декабрьдә тапшырылырга тиеш, шуңа күрә аны графиктан артта калучылар рәтенә кертмәскә мөмкин дип аңлатып үтте.
“2 атна эчендә динамика юк. Яхшы һава шартлары торганда начар эшләгәч, кыш көне яхшы эшләячәксезмени? Сез нигә миңа әкият сөйлисез?” – дип шәрехләде слайдларны Татарстан Президенты Рөстәм Миңнеханов. “Әйдәгез, бер-беребезне аңлап яхшырак эшлик”, - дип билгеләп үтте ул һәм эшләрне тиешле срокта тәмамлау кирәклеген ассызыклады. “Кешеләр авыл клублары әзер булуын көтә һәм иң мөһиме башкарылган эшләрнең сыйфатлы булуы, диде Рөстәм Миңнеханов. Киләсе елда авыл клублары төзелеше планнары турында ул эшләрне иртә язда башларга һәм объектларны җәй тапшыру зарур дип билгеләп үтте.