ТР Премьер-министры: “Чистай – борынгы традицияләргә бай шәһәр”

Бүген ТР Премьер-министры Илдар Халиков Чистайга эш сәфәре кылды, анда төрле объектларда булды һәм Шәһәр көне бәйрәмендә катнашты.
Быел 231 еллыгын бәйрәм иткән Чистайга РФ Дәүләт Думасы депутаты Александр Сидякин һәм РФ Мәдәният министрлыгы вәкиле килде.

Республика Хөкүмәте җитәкчесе “Алабуга” махсус транспорт заводы” ҖЧҖнең производство мәйданчыгында, Скарятински бакчасында, Борис Пастернак музеенда булды. Аңа музейда Чистай дәүләт тарих-архитектура һәм әдәбият музей-тыюлыгын төзү концепциясе тәкъдим ителде.

Аннары республика Премьер-министры Чистай үзәк стадионында Шәһәр көне бәйрәмендә катнашты. Анда ул Чистай районы предприятиеләре продукцияләре белән танышты һәм Чистайда беренче тапкыр узган ТР Икмәк комбинатлары хезмәткәрләре конкурсында катнашкан икмәк пешерүчеләр белән кондитерлар күргәзмәсен карады.

Илдар Халиков чистайлыларны ТР Президенты һәм шәхсән үз исеменнән бәйрәм белән котлады. “Чистайлылар горурлана ала. Чистай – борынгы традицияләргә бай шәһәр. Ул гасырлар буе эре индустриаль һәм авыл хуҗалыгы үзәге. Бөек Ватан сугышы чорында Чистай 200дән артык язучыны, мәдәният эшлеклесен һәм аларның гаилә әгъзаларын сыендырган”, - диде ул.

Соңгы елларда Чистайда яңа социаль объектлар пәйда була, дип билгеләп үтте республика Хөкүмәте җитәкчесе. “Бу шәһәрнең киләчәге бар”, - дип ассызыклады Илдар Халиков.

Ул чыгышы ахырында чистайлыларга уңышлар, сәламәтлек теләде һәм ТР бүләкләре тапшырды.

Шулай ук бәйрәмдә Александр Сидякин һәм Алексей Кучеренко котлаулары да яңгырады, Россия мәдәният министрының котлау хаты укылды, ул Чистай дәүләт тарих-архитектура һәм әдәбият музей-тыюлыгын төзү концепциясен уйлап табучыга рәхмәт белдерә һәм якын арада бу идея чынга ашачагына ышана.