Рөстәм Миңнеханов Сингапур эшлекле даирәсенә “Иннополис” проектын тәкъдим итте

Татарстан Президенты Рөстәм Миңнехановның эш сәфәре Сингапур Халыкара сәнәгать комитеты җитәкчесе һәм Сингапур Республикасы премьер-министры секретариатының икътисади үсеш буенча махсус киңәшчесе Филипп Йео әфәнде белән очрашу белән тәмамланды.

Очрашуда Татарстан Республикасыннан ТР Премьер-министры урынбасары – ТР Мәгълүматлаштыру һәм элемтә министры Роман Шәйхетдинов, ТР Президентының халыкара һәм тышкы икътисади мәсьәләләр буенча ярдәмчесе Радик Гыйматдинов, ТР Инвестицион үсеш агентлыгы җитәкчесе Линар Якупов, ТР Мәгълүмат технологияләре үзәге генераль директоры урынбасары, “Иннополис” проекты җитәкчесе Антон Грачев катнашты. Шулай ук Россия Элемтә һәм массакүләм коммуникацияләр министры урынбасары Марк Шмулевич һәм RunaCapital венчур фондына нигез салучы Сергей Белоусов та бар иде.

Татарстан күп еллар дәвамында Сингапур Республикасы тәкъдим иткән тәҗрибәгә таяна һәм мәгълүмат коммуникацияләре технологияләре, транспорт инфраструктурасы, мәгариф өлкәсендә тәҗрибә туплау өчен үз белгечләрен җибәрә, дип белдерде Рөстәм Миңнеханов.

Татарстан Президенты Сингапур эшлекле даирәсенә “Иннополис” проектын тәкъдим итте. Ул инновацион шәһәр төзелеше ТР Югары Ослан районында башланды дип сөйләде. 1200 га территориядә 155 мең кеше яши һәм эшли алыр дип планлаштырыла. Алар өчен берничә технопарк һәм торак төзеләчәк, инфраструктура – балалар бакчасы, мәктәп, музей, мәдәният йорты, кибет, медицина үзәге, күңел ачу учреждениеләре, IT-университет булачак.

“Иннополис” – федераль дәрәҗәдәге проект, - дип ассызыклады Рөстәм Миңнеханов. – Аны Ли Куан Ю һәм Россия Хөкүмәт Рәисе Дмитрий Медведев хуплады, проектта Карнеги Меллон университеты катнашуы турындагы килешү бар. Бу Россиядә мондый киң күләмле һәм дәрәҗәле беренче проект”.

Йео әфәнде проект зур кызыксыну уята һәм Сингапур эшлекле даирәләре белән хезмәттәшлек өчен зур мөмкинлекләр ача, дип белдерде. Ул киләчәктә үсеш стратегиясен бергәләп эшләү белән кызыксынуын белдерде. “Без диалог өчен ачык һәм Татарстан проектларында Сингапур тәҗрибәсен куллану вариантлары буенча фикер алышуга әзер”, - дип ассызыклады ул.

Очрашу ахырында ТР Президенты Рөстәм Миңнеханов Йео әфәндене Татарстанга чакырды һәм урында “Иннополис” концепциясен өйрәнергә, инновацион үсеш буенча республика партнеры булырга мөмкин.