Казанда Татарстан-Люксембург бизнес-форумы ачылды

“Без Татарстанга Люксембург бизнесын һәм капиталын җәлеп итәргә телибез. Республикага бу сәфәрегез ике арада яңа уртак проектлар тууга этәргеч бирер дип ышанабыз”. Бүген “Корстон”да Татарстан-Люксембург эшлекле форумы ачылышында катнашкан ТР Президенты Рөстәм Миңнеханов сәламләү чыгышында Люксембург Герцоглыгы премьер-министры Жан-Клод Юнкер җитәкчелегендәге делегациягә әнә шулай дип мөрәҗәгать итте.

Татарстанның инде моңа кадәр дә Люксембург компанияләре белән эшләү тәҗрибәсе бар иде. Банк, венчур финанславы, мәгълүматлаштыру, консалтинг һ.б. өлкәләрдә хезмәттәшлек итү мисаллары да бар. Бүген Татарстанда Люксембург капиталы булган 3 предприятие теркәлгән. Татарстан икътисадына Люксембургтан җәлеп ителгән инвестицияләрнең гомуми күләме 2012 ел башына 351 млн доллар тәшкил итә. “Ләкин болар гына ике якның тулы мөмкинлекләрен куллану өчен җитми әле, яңа юнәлешләрне эзләргә кирәк”, -дип ассызыклады бүген Татарстан башлыгы.

Бүген Казанда ачылган Татарстан-Люксембург эшлекле форумының төп максаты ике арада икътисади-сәүдә багланышлары үсешенә һәм инвестицияләр җәлеп итүгә көчле этәргеч бирү һәм аны яңа дәрәҗәгә чыгару.

Билгеле булганча, икътисади үсешнең төп күрсәткечләре, яшәү дәрәҗәсе һәм сыйфаты, халыкка каралган социаль гарантияләр буенча Люксембург Европада гына түгел, дөньяда алдынгы позицияне били. Бүген ул Европадагы финанс үзәкләренең берсе. Икътисады үсешендә төп юнәлешләрнең берсе итеп мәгълүмат технологияләре һәм телекоммуникацияләр сайланган. Икътисад үсешендә тагын бер ныклы терәк булып сәнәгать секторы тора. Иннвовацияләр исә икътисади диверсификация һәм модернизациянең хәлиткеч элементы санала. Боларның барысы да Европаның кечкенә генә бу илен Татарстан белән якынайту өчен нигез булып тора.

Рөстәм Миңнеханов үз чыгышында Европаның күп кенә әйдәп баручы компанияләренең Татарстанда уңышлы гына эшләп килүен, эре социаль-инвестицияле проектларны гамәлгә ашыруга саллы өлеш кертүен ассызыклады. “Россиянең Бөтендөнья сәүдә оешмасына керүе Татарстанга Европа партнерлары белән үзара файдалы кооперацияне үстерергә, инвестицияләр җәлеп итүне киңәйтергә юл ача”, - дип искәртте ул.

Президент ассызыклавынча, республиканың тышкы сәүдә әйләнеше күләменең 70 проценттан артыгы һәм чит ил инвестицияләренең 98 проценты Европа илләренә туры килә. “Шуңа күрә без Европа берелегенең тиз арада икътисади кризистан чыгуын бик телибез. Икенче яктан караганда, кризисның яңа мөмкинлекләр, идеяләр һәм элемтәләр эзләү өчен уңайлы вакыт булуын бизнес вәкилләре яхшы аңлый”, -ди Рөстәм Миңнеханов.

Бүгенге көндә Люксембург белән Татарстан арасындагы тышкы сәүдә әйләнешендә күбрәк әлеге илдән импорт өстенлек итә. Бүген форум ачылышына кадәр ТР Президентының Люксембург премьер-министры, министрлары, эшлекле даирә вәкилләре белән эшлекле иртәнге аш кысаларында узган сөйләшүендә ике арада багланышларны үстерүнең яңа юнәлешләре хакында тәкъдимнәр каралган. Форум ачылышында яклар аларны тагын бер кат барлап узды.

“Люксембургны үзләрендә булган заманча технологияләрне кулланып безнең сәнәгать потенциалын модернизацияләүгә чакырабыз”, - дип искәртте Татарстан башлыгы. Аның сүзләренә караганда, бездә югары технологияләр, машина төзелеше, автокомпонентлар җитештерү, нефтехимия, энергия саклау, авиатөзелеш, төзелеш материаллары җитештерү, банк эшчәнлеге, консалтиг һ.б.юнәлешләрдә Люксембург компанияләре белән хезмәттәшлекне үстерү өчен яхшы мөмкинлекләр бар. Татарстан шулай ук Люксембург компанияләрен “Алабуга” МИЗының резидентлары арасында булуын да тели. Президент республиканың логистик үзәкләр,”Иннополис” проекты, шулай ук халыкара спорт ярышлары кысаларында да хезмәттәшлеккә әзер булуын белдерде.

Рөстәм Миңнеханов бу эшлекле форум кысаларында ике якның эшлекле даирә вәкилләре файдалы очрашулар уздырыр, ике як өчен файдалы проектлар хакында килешүгә ирешер, дигән ышаныч блдерде. “Без, үз чиратыбызда, бу проектларны гамәлгә ашырыга ярдәм итәргә әзер”, -дип ул форумга уңышлы эшчәнлек теләде.

Татарстанның икътисади-сәүдә, инвестицион потенциалы турында мәгълүмат биргән ТР сәнәгать һәм сәүдә министрының беренче урынбасары Руслан Кәбиров та Татарстанның Люксембург компанияләре һәм эшлекле даирә вәкилләре белән эшләргә ачык булуын тагын бер кат ассызыклады.