Рөстәм Миңнеханов Люксембург Премьер-министры белән очрашты

Бүген Люксембург Бөек Герцоглыгы Премьер-министры Жан-Клод Юнкер җитәкчелегендәге делегациянең Татарстан башкаласына рәсми визиты Казан Кремлендә төгәлләнде. Татарстан Президенты Рөстәм Миңнеханов белән очрашуда Люксембург ягыннан Бөек Герцоглыкның Иктисад һәм тышкы сәүдә министры Этьен Шнайдер, Люксембург Бөек Герцоглыгы Хөкүмәте эшләре белән идарә итүче Марк Колас, Люксембург Бөек Герцоглыгының Россия Федерациясендәге Гадәттән тыш һәм Тулы вәкаләтле илчесе Пьер Ферринг һәм башка эшлекле затлар, Татарстан ягыннан Премьер-министр Илдар Халиков, ТР Президентының халыкара һәм тышкы икътисади мәсьәләләр буенча ярдәмчесе Радик Гыйматдинов, Казан шәһәре мэры Илсур Метшин, ТР Инвестицион үсеш агентлыгы җитәкчесе Линар Якупов һәм башкалар катнашты.

“Сезне Казан Кремлендә сәламлим. Агымдагы елның апрель аенда Люксембургка кылган эш сәфәрен зур канәгатьлек хисе белән искә төшерәм. Казанга эш сәфәре Сездә дә уңай тәэсирләр калдырыр дип ышанам”, - дип башлады Рөстәм Миңнеханов ике яклы очрашуны.

“Люксембургның Россия Федерациясенә кылган, Казанда нокта куелган эш сәфәренең, Россия һәм Бөек Герцоглык арасындагы багланышларның тагын да ныгуына йогынты ясаячагына шигем юк”, - дип ассызыклый Президент.

“Без үзебезне лаеклы төстә күрсәтергә тиешбез. Бүген берничә очрашу уздырдык һәм якын арада Люксембург бизнесменнарыннан торган мәртәбәле делегациянең Татарстанга визиты планлаштырыла”, - дип белдерде Рөстәм Миңнеханов.

Татарстан Президенты Люксембург Хөкүмәте башлыгына Казанга кылган сәфәре өчен рәхмәтен җиткерде. “Безнең апрель аенда Люксембургка эш сәфәре барышында әйткән сүзегездә тордыгыз. Безгә килдегез, бу безнең өчен зур дәрәҗә һәм горурлык”, - ди Р. Миңнеханов. “Безнең үзара хезмәттәшлек масштабы күпкә зуррак булырга тиеш. Татарстан һәм Люксембург төрле өлкәләрдә элемтәдә тору өчен олы потенциалга ия. Безнең үзара бизнес үсеше өчен шартлар тудыру – Татарстан Хөкүмәте һәм Люксембург җитәкчелегенең бурычы булырга тиеш. Шәхсән безнең республикада югары үсешле сәнәгать, югары фәнни-технологик мөмкинлекләр дә бар. Татарстан Сезнең өчен Россия базарына чыгу өчен плацдарм булырга, ә Люксембург безнең өчен Ауропага керү урыны булырга тиеш”, - дип ассызыклады Президент һәм визит кысаларында төгәл проектларга чыгу мөһимлегенә дә игътибарны юнәлтте. Аның фикеренчә, бу аеруча мәгълүмати технологияләр өлкәсендә мөмкин булыр иде. “Без шулай ук автокомпонентлар җитештерү, энергонәтиҗәлелекне арттыру белән дә кызыксынабыз. Безнең машина, автомобиль төзелеше, нефть химиясе тармакларында потенциалыбыз бай”, - ди Рөстәм Миңнеханов.

ТР башлыгы чыгышында Казанда көтеләчәк дәрәҗәле спорт чаралары хакында да искәртеп узды.

Жан-Клод Юнкер исә Татарстан башлыгына, делегацияне җылы кабул итүләре өчен рәхмәтен җиткерде. “Минем сезнең матур башкалагыз турында күп укыганым булды, әмма аны үз күзләрем белән күрәсем килде”, - дип белдерде мактаулы кунак. “Сездә башкарылган күп эшләрне үзебездә дә тормышка ашырырга теләр идек. Безгә сезнең белән тагын да тыгызрак хезмәттәшлекне урнаштыру зур әһәмияткә ия. Без мөмкин кадәр күбрәк Люксембург эшмәкәрләрендә Татарстанга карата кызыксыну уятырга телибез”, - дип белдерде Премьер-министр һәм Люксембург компанияләренең Татарстан үсешенә үзенең саллы өлеш кертәчәгенә ышанычын белдерде. “Сезнең республика икътисадында Люксембург предприятиеләренең лаеклы урын алачагына ышаныйк”, - ди ул.

Бөек Герцоглыкның Иктисад һәм тышкы сәүдә министры Этьен Шнайдер исә биотехнологияләр үсеше, мәгүлүмати технологияләр, логистика өлкәләрендә Люксембургның шактый алга киткән дәүләт булуына ишарәләде. Ул шулай ук студентлар алмашы һәм IT-парклар арасындагы хезмәттәшлекне оештыру мәсьәләсенә тукталды. Аның фикеренчә, Казан һәм Люксембург арасында һава юлы элемтәсен дә оештыру мөмкин булыр иде. Бу туризм үсеше өчен мөһим, дип саный Этьен Шнайдер.

Татарстан – Люксембург хезмәттәшлегенә килгәндә, 2012 нче елның 1 нче яртыеллыгы нәтиҗәләре буенча, яклар арасында ике яклы тышкы сәүдә әйләнеше 816,6 мең АКШ долларын тәшкил иткән, шул исәптән экспорт 3,5 мең АКШ доллары күләмендә, импорт исә 831,1 мең АКШ доллары. Республикада Люксембург капиталы кертелгән 3 предприятие эшли, аларның икесе Люксембург инвесторларының устав капиталына 100 процентлык вклад белән. Люксембургтан Татарстан икътисадына тупланган чит ил инвестицияләре күләме ел башына 351 миллион АКШ долларыннан гыйбарәт. Татарстанның Люксембург Бөек Герцоглыгы белән хезмәттәшлегенең перспективалы юнәлешләренә килгәндә, Люксембург компанияләрен “Алабуга” МИЗ ына җәлеп итү; инновацияләр өлкәсендә хезмәттәшлек үсеше; энергетика, автомобиль һәм машина төзелеше өлкәләрендә предприятиеләр арасында партнерлык мөнәсәбәтләрен җайга салу; химия, пыяла, азык-төлек сәнәгате, логистика хезмәтләре өлкәләрендә кооперация элемтәләре үсеше; фармацевтика һәм медицина товарларын җитештерү өлкәләрендә хезмәттәшлек үсеше; дәвалау учреждениеләрен югары технологияле медицина җиһазлары белән тәэмин итү; финанс һәм банк хезмәтләре; алдынгы мәгълүмати технологияләр өлкәсендә уртак проектларны гамәлгә ашыру кебекләрне санап узарга була.