Рөстәм Миңнеханов миграция сәясәте буенча округ киңәшмәсендә катнашты

Бүген Сарытауда РФ Президентының Идел буе федераль округындагы Тулы вәкаләтле вәкиле каршындагы Советның “Дәүләт миграция сәясәте концепциясен гамәлгә ашыруның дәүләт аспектлары турындагы” утырышы узды. РФ Президентының ИФО Тулы вәкаләтле вәкиле Михаил Бабич уздырган утырышта Татарстан Президенты Рөстәм Миңнеханов та катнашты.
Михаил Бабич киңәшмәне ачып, миграция нәтиҗәлерәк булырга тиеш дип билгеләп үтте. Аның фикеренә караганда, миграция агымын көйләүче закон базасы камилләштерүгә мохтаҗ.
Округның географик үзенчәлекләре нәтиҗәсендә, Идел буе федераль округы өчен миграция сәясәте актуаль булып тора. “Кызганычка каршы, халыкның китү мәсьәләсен хәл итеп булмады һәм аны миграция исәбенә генә көйләп булачак, әмма мигрантлар агымы идарә итәрлек булырга тиеш, - диде Президентның ИФО Тулы вәкаләтле вәкиле. – Безгә эшче куллар кирәк. Икенче яктан, икътисади проблемалар, куркынычсызлык проблемалары бар. Эшче мигрантларны җәлеп итү стандартлары эшләнмәгән”.
Аның сүзләренә караганда, 6 елда округка 3 мең кеше килгән һәм теркәлгән – бу бик аз. 7 айда Идел буе федераль округыннан 1,2 мең легаль булмаган чит ил кешеләр һәм гражданлыгы булмаганнар чыгарылган.
Киңәшмәдә Сарытау өлкәсе губернаторы Валерий Радаев ясаган төп докладында агымдагы елның 7 аенда округтан 90,8 мең кеше киткән, ә 79,6 мең кеше килгән дип белдерде. Шул ук вакытта 8 төбәк округында халыкның күчеп китүе күзәтелә. Шуңа күрә төбәкләр өчен чит ил эшче кулларын җәлеп итү актуаль булып тора. Округ чит ил мигрантларын җәлеп итүчәнлеге буенча илдә өченче урынны били. Аларны актив кабул итүче төбәкләргә Башкортстан, Татарстан һәм Түбән Новгород өлкәсе керә.
2012 елның 1 августына булган мәгълүматларга караганда, округ территориясендә вакытлыча рөхсәт буенча 68575 чит ил гражданы яши. Аларның бер өлеше түбән хезмәт хакына хезмәт куя.
Күп кенә төбәкләрдә чит ил гражданнары милләтара мөнәсәбәтләр киеренкелеген көчәйтә. Төрмәдән чыккан чит ил мигрантлары аерым проблема булып тора.
Шулай да бу чорда ИФО төбәкләренең күбесендә эшче кулларга булган ихтыяҗны чит ил мигрантлары һәм БДБ илләрендә яшәүче ватандашларны кайтару белән генә хәл итеп була.