Менделеевскта район башлыгы сайланган

Бүген Менделеевскта Менделеевск муниципаль районы Советының чираттан тыш, 25 нче утырышы үтте.

Аның эшендә ТР Премьер-министры Илдар Халиков һәм ТР Президенты Аппараты җитәкчесе урынбасары – ТР Президентының Территорияләр белән эшләү идарәсе башлыгы Илнур Гарипов катнашты. Көн үзәгендә район башлыгын һәм җирле хакимиятнең вәкилләр органы җитәкчесен сайлау торды.

ТСК рәисе Мәхәмәтнур Сабитов Абалач һәм Монашево авыл җирлекләре советлары утырышы, шулай ук шәһәр Җирле үзидарә советы утырышы нәтиҗәләрен әйтте, анда район Советына вәкилләр сайланган: Игорь Привалов – Менделеевск шәһәре башлыгы, Абалач һәм Монашево авыл җирлекләреннән Рөстәм Гафаров һәм Ролан Шәмсетдинов.

Менделеевск шәһәре Советы депутаты итеп сайлангач, һәм ТР Сайлау кодексының 120 мәддәсенең 1 нче пункты нигезендә район Советы депутатлары Игорь Приваловның район Башкарма комитеты җитәкчесе вазыйфасыннан китүе турындагы гаризасын канәгатьләндерделәр.

Менделеевск районы Уставының 38 нче мәддәсе нигезендә район башлыгы депутатлар арасыннан сайлана. Бу мәсьәлә буенча ТР Премьер-министры Илдар Халиков чыгыш ясады, ул сайлауларны яхшы оештырган өчен, район активына рәхмәтен белдерде.

“Бөтен округларда да күп сайлаучыларның килүе мөһим, - диде ул. – “Бердәм Россия” кандидатлары ышандырырлык җиңү яуладылар. Димәк, районда яхшы команда оешкан. Бүген депутатларга җаваплы карар кылырга кирәк – район җитәкчесен сайларга. ТР Президенты кушуы буенча, район башлыгы һәм район Советы рәисе вазыйфасына Игроь Приваловны тәкъдим итәм” .

Утырышта 9 ай дәвамында район Башкарма комитеты җитәкчесе булып эшләгәндә, Игорь Приваловның үзен принципиаль, таләпчән, катлаулы мәсьәләләрдән курыкмый торган кеше итеп күрсәтә алуы билгеләнде. 2012 нче елда бик күп эш башкарылган. Район республика һәм федераль программаларны тормышка ашыруда актив катнашкан.

И.Приваловны хуплап, район советы депутаты, “Л.Карпов исемендәге химзавод” генераль директоры Д.Шәмсин чыгыш ясады.

Депутатлар тәкъдим ителгән кандидат өчен тавыш бирделәр.

Игорь Привалов ант бирде һәм күрсәткән ышанычлары өчен, депутатларга һәм Менделеевск халкына рәхмәтен белдерде.

Яңа район җитәкчесе аерым рәхмәт сүзләрен республика Президенты Рөстәм Миңнехановка, Илдар Халиков йөзендә ТР Хөкүмәтенә әйтте.

“Муниципаль берәмлек җитәкчесе вазыйфасын, беренче чиратта, безнең халык алдында зур җаваплылык буларак кабул итәм. Сезнең ышанычны аклар өчен, барын да эшләрмен”, - диде ул.

“РФдә җирле үзидарәне оештыруның гомуми принциплары турындагы”ФЗ 37 нче мәддәсе, “ТРда җирле үзидарә турындагы” ТР законының 26 нчы мәддәсе, Менделеевск муниципаль районы Уставының 47 нче мәддәсе нигезендә район Башкарма комитеты җитәкчесе вазыйфасына конкурс игълан ителгән.