Рөстәм Миңнеханов мөселман руханилары җитәкчеләрен Корбан бәйрәме белән котлады

Татарстан Республикасы Президенты Рөстәм Миңнеханов Россия Мөфтиләр шурасы рәисе, Россиянең Европа өлеше мөселманнары Диния нәзарәте рәисе, мөфти шәех Равил Гайнетдинне; Баш мөфти, Россия мөселманнарының Үзәк Диния нәзарәте рәисе Тәлгать Таҗетдинне; Татарстан Республикасы мөселманнары Диния нәзарәте рәисе мөфти Илдус Фәезне Корбан бәйрәме белән котлады.
“Мөселман өммәтенең иң сөекле бәйрәмнәреннән берсе – Корбан бәйрәме – Ислам әһеленең миһербан-мәрхәмәткә, якыннарына һәм мохтаҗларга ярдәм итүгә омтылуын гәүдәләндерә. Нәкъ менә шушы гомумкешелек идеаллары, Исламның хак кыйммәтләре һәрбер мөэмин өчен тормыш юлында әхлакый маяк булырга һәм илебез гражданнарына күпмилләтле һәм күпконфессияле тату җәмгыять төзергә булышырга тиеш.”, - диелә Рөстәм Миңнехановның мөфти шәех Равил хәзрәт Гайнетдингә җибәргән котлавында.
Тәлгать хәзрәт Таҗетдинне бәйрәм белән котлап, республика башлыгы: “Гасырлар кичеп тә югалмаган бу борынгы йола күңелләребезне шәфкать һәм мәрхәмәт нуры белән яктырта, шөкерана кылып, мохтаҗларга ярдәм кулы сузып яшәргә өйрәтә. Корбан бәйрәме дөньяның үзе кебек үк борынгы хакыйкатьне хәтеребезгә төшерә: малы күп булган түгел, якыннары белән бүлешкән кеше генә чынлап бай була”, - дип билгеләп үтә.
“Бәйрәм мөбарәк, шатлыгы уртак булсын дигән теләктә калам, һәм Татарстанда Ислам дине әһелләренең милли-әхлакый күтәрелеш, тынычлыкны, үзара аңлашып тату яшәүне ныгыту, яшь буынга тәрбия бирү юнәлешендә актив эш алып барулары өчен рәхмәтемне җиткерәм. Гаять мөһим һәм хәерле бу эш киләчәктә дә дәвам итәргә тиеш  дип уйлыйм ”, – дип ассызыклый Рөстәм Миңнеханов үзенең Илдус хәзрәт Фәезгә җибәргән телеграммасында.