Илдар Халиков Халыкара йөзү федерациясе җитәкчеләре белән очрашты

Бүген Казанда Татарстан Премьер-министры Илдар Халиков Халыкара йөзү федерациясе президенты Хулио Сезар Маглионе һәм федерациянең башкарма директоры Корнел Маркулеску белән очрашты. Очрашуда шулай ук ТР яшьләр эшләре, спорт һәм туристлык министры Рафис Борһанов һәм 2013 елгы Универсиада дирекциясе башлыгы Владимир Леонов катнашты.
Хулио Сезар Маглионе белән Корнел Маркулеску спортның су төрләре буенча FINA Бөтендөнья конвенциясе алдыннан Казанга сәфәр кыла. Ул 29 октябрьдән алып 1 ноябрьгә кадәр Мәскәүдә узачак. FINA президенты һәм башкарма директоры республика башкаласына Казанның 2015 елда су төрләре буенча дөнья чемпионатын үткәрүгә әзерлеген тикшерү өчен килде. Халыкара федерация җитәкчеләре меңьеллык шәһәрне, спорт корылмаларын, кунакханәләрне карады, транспорт инфраструктурасына бәя бирделәр.
Бүген ТР Хөкүмәт йортында Илдар Халиков кунакларны сәламләде һәм Казанга сәфәр программасы бай булачак дип белдерде. Татарстан Премьер-министры Казанда 2013 елгы Универсиадага әзерлек тәмамлана дип белдерде. Барлык спорт һәм транспорт объектлары йөзү буенча дөнья чемпионаты үткәрүгә бер ел кала әзер булачак, бу ярышларны югары дәрәҗәдә үткәрү мөмкинлеге бирәчәк.