Татарстанда ТКХ хезмәтләрен күрсәтү сыйфатына карата халык шикаятьләре 40 процентка арткан

Бүген ТР Хөкүмәт йортында торак төзелеше һәм аны гамәлгә кертү мәсьәләләре буенча видеоконференция режимында узган киңәшмәдә, ТР Президенты Рөстәм Миңнеханов халыкка торак-коммуналь хезмәтләр күрсәтүче оешмаларны тәнкыйть утында тотты.

“Безнең ТКХ тармагында җитди проблемаларыбыз бар. Хакимият органнары адресына әлеге мәсьәләләр буенча халыктан күпсанлы шикаятьләр килеп ирешә. Аларның саны 40 процентка арткан. Вәзгыять аралаш субсидияләүдән киткәч тагын да кискенләште”, - диде ул.

Республика башлыгы шулай ук халыкка аңлату эшләренең җитеп бетмәвен билгеләп үтте һәм ММЧ, муниципаль берәмлек, министрлык һәм ведомство башлыкларын бу эштә актив катнашуын сорады.

Моннан тыш, Рөстәм Миңнеханов торак структураларының еш кына гражданнар мөрәҗәгатьләренә колак салмавын, кешеләргә битарафлык күрсәтүен, ахыр чиктә моның бу структураларга шикаятьләр санының үсүенә китерүен билгеләп үте.

“Торак-коммуналь хезмәтләр – гражданнар чыгымнарының иң күләмлесе. Моңа берничек тә салкын карарга ярамый. Моннан тыш, бу безнең халыкның яшәү мохите. Җылы су, җылылык, чүп чыгару халык кәефендә чагылыш таба. Счетлар килә, ә хезмәтләр җиренә җиткереп күрсәтелми. Тәртип урнаштыру һәм бу юнәлештә эшләүче хезмәткәрләрдә җаваплылык хисе уяту зарур. Моңа безнең көчебез дә, чараларыбыз һәм вәкаләтләребез дә җитәрлек”, - дип ассызыклый Президент.

Рөстәм Миңнеханов бу юнәлештә эшне җанландыруга 10 көн вакыт бирде. “Прокуратура катнашы белән барлык нәрсәне дә тикшерәчәкбез: поставщиклар белән мөнәсәбәтләрне, субсидияләр буенча эш куелышын, шикаятьләр буенча эшне дә. Эшебез нәтиҗәләре буенча ТР Хөкүмәте утырышын уздырачакбыз”, - дип хәбәр итте ул.

Сүзен йомгаклап, республика җитәкчесе тарифлар хезмәтенә, хезмәтләр поставщиклары өстеннән һәм бәяләр билгеләү буенча төгәл күзәтчелек алып барырга боерды. “Хезмәтләргә тарифлар уртача республика күрсәткечләреннән югарырак булган җирләрдә технологик карарлар кирәк”, - диде ул.