Казахстан бизнес-делегациясенә Татарстан икътисадының эре проектларын тәкъдим иттеләр

Бүген Казанда Казакъстан Илкүләм икътисади палатасы “Атамекен” берлеге президиумы рәисе Тимур Кулибаев җитәкчелегендәге бизнес-даирә делегациясенең эшлекле визиты кысаларында Татарстан икътисадының эре проектларын тәкъдим иттеләр. Кунакларны Татарстан Президенты Рөстәм Миңнеханов озатып йөрде.

Казан IT-паркында вице-премьер – республика мәгълүматлаштыру һәм элемтә министры Роман Шәйхетдинов делегация әгъзаларына технопарк һәм “Иннополис” проекты хакында сөйләде. Министр мәгълүматларына караганда, хәзер Казан ИТ-паркында 71 компания-резидент, 1700 хезмәткәр эшли. Резидентлардан кергән табыш 100 млн. доллар тәшкил итә, төрле дәрәҗәдәге бюджетларга 450 млн. сум салым түләнгән . Чаллыда да ИТ-паркның икенче мәйданчыгы эшли башлады. Казан федераль университеты каршында әйдәп баручы чит ил компанияләре белән бергә Югары мәгълүмати технологияләр мәктәбе ачылган.

Узган елдан башлап Казанда интернат тибындагы ИТ- лицей эшли, ТР җитәкчелеге химия юнәлешендәге шундый ук лицей ачарга ниятли, дип өстәде Татарстан Президенты Рөстәм Миңнеханов.

Казакъстан Илкүләм икътисади палатасы “Атамекен” берлеге президиумы рәисе Тимур Кулибаев “Иннополис” проектының архитектур планлаштыру буенча авторы белән кызыксынды. Рөстәм Миңнеханов мастер-план төзү буенча Сингапурның дәрәҗәле RSP Architect бюросы җәлеп ителде дип сөйләде. ТР Президенты сүзләренә караганда, дөньяви тәҗрибәгә таянып яңа шәһәрдә 150 мең кеше яшәве күздә тотыла, инфраструктура һәм яшәү уңайлыкларының бәясе сайланган.

“Алабуга” махсус икътисади зонасы эше хакында аның генераль директоры Тимур Шаһивәлиев сөйләде. МИЗ төзүгә дәүләт 500 млн. доллар сарыф итте, шул ук вакытта компания-резидентлар миллиард керттеләр инде, ә 31 резидент белдергән инвестицияләр күләме – 3 млрд. доллар, диде ул.

МИЗ ның эре резиденты “Форд-Соллерс”. Хәзер Алабугада заводта “Форд Транзит” коммерцияле автомобильләр чыгарыла, киләчәктә машиналар җитештерү күләме бер елга 80 мең тәшкил итәчәк. Биредә ел саен “Форд”лар өчен 180 мең двигатель җитештерәчәкләр.

Рөстәм Миңнеханов белдергәнчә, күп кенә чит ил компанияләре махсус икътисади зонага килергә кызыга. Хәзерге вакытта теркәлгән 31 резидентка тагын 4 өстәлергә мөмкин. МИЗ мәйданын 20 дән 40 квадрат метрга кадәр арттыру ниятләнә. “Бүгенге көндә бу Росссиядә иң уңышлы МИЗ”, - дип ассызыклады ТР Президенты.

Менделеевски “Аммоний” заводын төзү проекты хакында компаниянең директорлар советы рәисе Ринат Ханбиков сөйләде. Казакъстан бизнесменнары Татарстанның чит ил компанияләрен һәм технологияләрен җәлеп итү тәҗрибәсе, шулай ук проектны финанслау белән кызыксынды.

Кунаклар ИТ-парк бизнес-инкубаторында нәтиҗәле проектлар белән танышты, биредә делегация әгъзаларына электрон документ әйләнеше һәм электрон рәвештә дәүләт хезмәтләре системасы белән таныштырдылар. Роман Шәйхетдинов сөйләвенчә, хәзерге вакытта Татарстанда 140 дәүләт хезмәте электрон рәвешкә китерелгән, ай саен алардан 1,7 миллион тапкыр кулланалар.

Тимур Кулибаев бизнес инкубаторда “Яңа җиңүләр һәм яңа бизнес-идеяләр” дип язып калдырды.

Шулай ук Казакъстан делегациясе ИТ-паркта “ГЛОНАСС+112” системасы белән идарә итү үзәгендә, Универсиада авылында, шул исәптә яңа медицина үзәгендә һәм Теннис академиясендә булды.