Рөстәм Миңнеханов: Татарстан инвестицияләр өчен ачык

“Татарстан инвестицияләр өчен ачык һәм республика территориясендә проектларын гамәлгә ашырырга теләк белдергән компанияләргә, инвесторларга максималь ярдәм күрсәтергә әзер”. Лондондагы Investment Opportunities in Tatarstan бизнес-форумында катнашкан ТР Президенты Рөстәм Миңнеханов шулай дип белдерде.

Investment Opportunities in Tatarstan форумын CNBC компаниясе ТР Инвестицион үсеш агентлыгы белән берлектә оештырды. Аның максаты – Татарстанның дөньяда инвестицияләр җәлеп итү сәләтен күтәрү, төбәкнең инвестиция потенциалын халыкара бизнес җәмәгатьчелегенә презентацияләү.

Форумда катнашучылар алдында ясаган чыгышында Рөстәм Миңнеханов презентацияне оештыручыларга, Татарстанның инвестицион-икътисади потенциалы белән кызыксынган Бөекбританиянең эшлекле даирә вәкилләренә рәхмәт белдерде. Татарстан башлыгы аерым рәхмәт сүзләрен сәфәрне оештыруда ярдәм иткән Россиянең Бөекбританиядәге Гадәттән тыш һәм Тулы вәкаләтле илчесе Александр Яковенкога җиткерде. “Бүген Татарстанда бизнесны уңайлы итеп алып бару өчен барлык шартлар тудырылган, заманча сәнәгый мәйданнарны, индустриаль паркларны, бизнес-процесслар аутсорсинг үзәкләрен үстерү буенча актив эш бара”, -дип билгеләп үтте Рөстәм Миңнеханов.

Бүген республикада инвесторлар белән хезмәттәшлек итү өчен заманча инфраструктуралы технопарклар челтәре (IT-парк, “Химград” технополисы, “Идея” технопаркы), бизнес-инкубаторлар, әйдәп баручы белем бирү, фәнни-тикшеренү учреждениеләре бар. Президент “Алабуга”МИЗының аеруча танылуын, биредә резидент-компанияләр өчен әзер сәнәгать, инженерлык, таможня һәм транспорт инфраструктурасы булдырылуы хакында сөйләде. Шулай ук бүген Татарстанда РФ Хөкүмәте булышлыгы белән “Смарт-Сити Казан” һәм “Иннополис” инновацияле иярчен шәһәре проектларының гамәлгә ашырылуына тукталды. Рөстәм Миңнеханов “Иннополис” проектының күптән түгел МИЗ статусын алуын да җиткерде.

“Татарстан террииториясендә дөньяның күп кенә әйдәп баручы компанияләре актив эшли, эре социаль-икътисади проектларны гамәлгә ашыруга зур өлеш кертә”, - дип белдерде Рөстәм Миңнеханов. Ул шулай ук үз чыгышында якын елларда Татарстанда узачак халыкара масштабтагы чараларга (2013 елгы Казан Универсиадасы, спортның су төрләре буенча 2015 елда узачак дөнья чемпионаты, 2018 елдагы футбол буенча дөнья беренчелеге һ.б.) тукталып узды.

Форум эшендә ТР Президенты ярдәмчеләре Радик Гыйматдинов, Айрат Нуретдинов, ТР Инвестицион үсеш агентлыгы җитәкчесе Линар Якупов, “Алабуга” МИЗы генераль директоры Тимур Шаһивәлиев, ТР Сәүдә-сәнәгать палатасы рәисе Шамил Агеев һ.б. катнашты.

Бизнес-форум соңында SMART City Kazan проектын гамәлгә ашыру кысаларында халыкара күргәзмәләр һәм конференцияләр үзәген төзү буенча “ТР Үсеш корпорациясе” ААҖ белән “Стратеджик Маркетинг энд Эксибишнз” компаниясе арасында үзара аңлашу турында меморандум имзаланды.

Белешмә өчен: 2011 ел йомгаклары буенча Ernst&Young компаниясе һәм Forbes басмасы Татарстанны бизнесны алып бару өчен иң яхшы төбәк буларак билгеләп үтте.