15 ноябрьдә Казанда "Парковка" исемле айлык башлана

Казанда хәзерге вакытта паркинглар төзү буенча эш алып барыла: 2006 елдан бирле 38 җир участогы шушы максатларга бүлеп бирелгән, тагын 20 участок паркинг төзү ихтималына дип каралган. Инвесторларны җәлеп итү максатында, ә бу бизнес “озын акчалы” санала, алар өчен салымнар минилаь дәрәҗәгә калдырып киметеп түли, муниципаль җир һәм ЕНДВ салымнарыннан азат ителгән. ТР Президенты Рөстәм Миңнеханов йөкләмәсе белән, Универсиадага кадәр Казанда 6 мең машина урынына исәпләнгән 12 парковка беренче чиратта төзелергә тиеш.

Бүген ТР Министрлар Кабинетында ТР Премьер-министры урынбасары Әсгать Сәфәров рәислегендә барган юл хәрәкәте иминлеген тәэмин итү буенча хөкүмәт комиссиясе утырышында Казан каласы Башкарма комитеты башлыгы вазифаларын башкаручы Рөстәм Нигъмәтуллин шулай дип ачыклык кертте. Хәзерге вакытта республика башкаласында Батурин/Маркс, урамнары чатында, метроның “Кремль” станциясендә, “Кольцо” сәүдә үзәге янында күп катлы 3 паркинг эшли, тагын 7сен ел ахырына кадәр сафка бастыру планлаштырыла: Оренбург трактында, Островский/Пушкин, Челюскин/Беломорская, Астрономия/Профсоюз, Профсоюз/Кави Нәҗми, Чистай (“Татнефть-арена” янында) урамнарында, вокзал алды мәйданында. Нәтиҗәдә, шуларда барлыгы 3 мең машина калдыру мөмкин булачак. Метрополитенның “Кремль”, “Горки”, “Тукай мәйданы”, “Авиатөзелеш” станцияләре янында барлыгы 500 машина калдыру урыннары бар, ләкин “Җиңү проспекты” станциясе яны территориясендә аны төзү проблемалы, диде ул. Болардан тыш, торак массивларда күп катлы паркинглар, “Мега”, “Корстон”, “Тандем”, “XL”, “Сувар-Плаза”, “Ашан” кебек сәүдә һәм күңел ачу үзәкләре янында машина куеп калдыру урыннары каралган. Җыеп кына әйткәндә, Казан Универсиадага кадәр үзәкне 5,5 мең машиналык паркинг, стоянка белән тәэмин итәргә планлаштыра, диде Р.Нигъмәтуллин.

Республиканың ЮХИДИ идарәсе башлыгы Рифкать Миңнеханов, халык паркинглар турында мәгълүматлы түгел, дигәч, комиссия утырышында башкала парковкаларының теләсә кем таныша алырлык белешмәләр базасы булдырылу зарурияте кузгатылды. Җыеп кына әйткәндә, онлайн режимында эшли торган электрон мәгълүмат базасы булдыру, аны кесә телефоны ярдәмендә теләсә кайсы урында карап булу мөмкинлеге ярашлы, диелде. Автомольчеләр, автомәктәпләргә бәйле иҗтимагый һ.б. оешмалар вәкилләреннән исә мондый тәкъдимнәр бирелде: автомәктәпләрдә зачет биргәндә Казан парковкаларының кайдалыгын күрсәтә-әйтә белү таләбен кертергә, шуның өчен алар турында алдан 10 минутлык фильм төшереп, курсантларга күрсәтергә, парковка схемалары ясалган буклетлар таратырга, парковкалар янына зур таблолар беркетеп, аларда күпме буш урын калганы күрсәтелерлек итеп эшне оештырырга һ.б.

Республика комиссия рәисе урынбасары Әсгать Сәфәров игълан иткәнчә, 15 ноябрьдән “Парковка” айлыгы үткәрергә, шуңа массакүләм мәгълүмат чаралары, яшьләрнең иҗтимагый оешмалары, аеруча Россия автомобильчеләре җәмгыятьләренең җирле вәкилләрен, волонтерларны җәлеп итәргә кирәк булачак.