Рөстәм Миңнеханов рәислегендә "Алабуга" МИЗ Күзәтүчеләр советы махсус икътисадый зона резиденты булырга дәгъва кылучы дүрт проектны карады

Бүген Татарстан Республикасы Президенты – Күзәтчелек советы рәисе Рөстәм Миңнеханов “Алабуга” махсус икътисади зонасы Күзәтчелек советы утырышын үткәрде. Утырыш ТР Хөкүмәт йортында узды.

Рөстәм Миңнеханов утырышны ачып, Татарстан Республикасы территориясендә тагын бер махсус икътисади зона “Иннополис” пәйда булды дип искәртте. “Иннополис” МИЗ Татарстанның Югары Ослан һәм Лаеш районнарында төзү планлаштырыла.

Р.Миңнеханов белдергәнчә, МИЗ резиденты статусына дәгъва белдерүче 4 проект каралачак.

Беренче итеп “Алабуга” МИЗ территориясендә “Форд Соллерс Алабуга” ҖЧҖ һәм башка җитештерүчеләр өчен җиңел автомобильләр металл компонентлары җитештерүне оештыру буенча “Джошкуноз Алабуга” ҖЧҖ проекты тәкъдим ителде. “Джошкуноз Алабуга” ҖЧҖ Төркиянең “Джошкуноз Холдинг” холдингы тарафыннан оештырылган, ул базарда 60 ел хезмәт куя. “Джошкуноз”ның клиентлары – “Форд”, “Фиат”, “Тойота”, “Фольксваген” һ.б.

Икенче проект – “Алабуга” МИЗ территориясендә пластмасс эшләнмәләрне җитештерүне оештыру. Проектның инициаторы – “Бытпласт” ҖЧҖ, ул 2000 елда Мәскәүдә гамәлгә куелган. Проектта –“Алабуга” МИЗ территориясендә аш бүлмәсе һ.б. өчен пластмасс эшләнмәләр җитештерү каралган. “Түбән Кама Нефтехим” ҖЧҖ чималын файдалану күздә тотыла.

Утырышта катнашучылар шулай ук гигиена продукциясе җитештерүне оештыру буенча “Хайджин Текнолоджиз” ҖЧҖ проектын карадылар. Компания Россиянең әйдәп баручы җитештерүчеләренең берсе, 2011 елның языннан алып шәхси гигиена чаралары җитештерү буенча халыкара холдинг составына кергән.

Соңгы проект буларак, “Черкизово” төркеме тәкъдим иткән “Алабуга” МИЗ территориясендә ит продукциясе производствосын оештыру каралды. Элек чит ил чималы кулланылачак, аннары Татарстан Республикасыннан җирле чималга күчү күздә тотыла.

Рөстәм Миңнеханов утырышта тәкъдим ителән проектларга уңай бәя бирде.

Гомумән алганда, ТР Президенты билгеләп үткәнчә, проектлар “Алабуга” махсус икътисади зонасы үсешенә этәргеч булачак. Моннан тыш яңа резидентлар федераль һәм төбәк бюджетына салым күләмен арттырачак.

“Алабуга” махсус икътисади зонасы Күзәтчелек советы утырышында каралган проектлар ноябрьдә РФ Икътисади үсеш министрлыгы каршындагы сәнәгать махсус икътисади зоналары буенча эксперт советы утырышында тәкъдим итү көтелә.