“Йокогава электрик” Татарстанда техник хезмәт күрсәтү буенча халыкара үзәк ачачак

Техник хезмәт күрсәтү буенча халыкара үзәк ачу, мәгариф программаларын үстерү һәм алга таба да Татарстанның масштаблы сәнәгать программаларында катнашу – “Йокогава электрик” компаниясенең алдагы планнары шуннан гыйбарәт. Бу хакта бүген ТР Хөкүмәт йортында узган очрашуда ТР Президенты Рөстәм Миңнехановка компания президенты Шузо Кайхори җиткерде. Очрашу вакытында Татарстан Республикасы белән “Йокогава электрик” арасында Ниятләр беркетмәсе имзаланды.

Рөстәм Миңнеханов Шузо Кайхорига Татарстанга сәфәре өчен рәхмәт белдереп, компаниянең республикада шактый проектларны гамәлгә ашыруда катнашуын искәртте. Мәсәлән, “Йокогава электрик” республиканың нефть эшкәртү һәм нефтехимия предприятиеләренә электр җиһазларын автоматлаштыру буенча чишелешләр тәкъдим итә, шулай ук белем бирү процессларында актив катнаша. “Боларның барысы да сезнең бирегә озакка килүегез турында сөйли”, -дип белдерде Татарстан башлыгы.

Рөстәм Миңнеханов сүзләренә караганда, нефть эшкәртү өлкәсендә “Йогогава”ны “Аммоний” проекты, “ТАИФ-НК”ның авыр калдыклар эшкәртү комплексы, “ТАНЕКО” проектының дәвамы, “Түбән Кама нефтехим”ның этилен җитештерү комплексы кызыксындыра ала.

ТР Президенты сүзләренә караганда, республикада нефтехимия тармагыннан тыш, IT-юнәлеш тә үсә, “Йокогава электрик” бу тармакка да игътибар итә ала. “Йокогава” кебек компания республикада булган потенциалны файдаланырга һәм Татарстанның IT - секторында тагын да киңрәк урын алырга тиеш”, -диде ул.

Компания президенты Шузо Кайхори, үз чиратында, “Йокогава электрик”ның Тататрыстанда бизнесын үстерүгә кагылышлы планнары белән уртаклашты. Мәсәлән, компания 2013 ел азагына кадәр Түбән Камада төбәкара техник хезмәт күрсәтү үзәген ачарга ниятли. Ул Идел буе федераль округында компания җиһазларына барлык төр техник хезмәт күрсәтү белән шөгыльләнәчәк. Шузо Кайхори Татарстанның “Йокогава электрик” җиһазларын кулланучы эре компанияләрен техник хезмәт күрсәтүгә килешү төзергә чакырды.

Ул компаниянең Татарстанда эшләү буенча шактый тәҗрибә туплавын, проектларны гамәлгә ашыру барышында инфраструктура төзелүен, персоналның укытылуын ассызыклады. Шузо Кайхори “Йокогава электрик”ның Татарстанда алга таба да нефть химиясен һәм нефть эшкәртүне үстерү буенча проектларында катнашырга әзер икәнлеген белдерде. Компания башлыгы үзле нефть табу буенча сәнәгать объектларын автоматлаштыру тәҗрибәсен “Татнефть” белән бүлешү тәкъдимен кертте. “Йокогава” мондый тәҗрибәне Канада ятмаларында эшләп туплаган.

Шузо Кайхори Япониянең “Йокогава электрик” үзәгендә “ТАНЕКО” ның техник җитәкчеләрен укыту программаларын тәкъдим итте.

Татарстан Президенты Рөстәм Миңнеханов әлеге тәкъдимнәрне хуплады. “ Нефть эшкәртү һәм нефть химиясе өчен ышанычлылык мәсьәләсе – беренче урында. Без техник хезмәт күрсәтү буенча килешүләр төзиячәкбез. Татарстанда белем бирү үзәкләре , техник ярдәм күрсәтү үзәкләре булганда, сезнең белән элемтәләр тагын да тыгызрак булачак”, - дип белдерде Татарстан башлыгы.

Очрашуда катнашкан Татарстанның эре нефть химиясе предприятиеләре җитәкчеләре “Йокогава электрик”ның барлык тәкъдимнәрен җентекләп өйрәнәчәкләрен белдерде.

Очрашу соңында ТР Республикасы белән “Йокогава электрик корпорейшн” арасында Ниятләр беркетмәсенә кул куелды. Документны ТР Президенты Рөстәм Миңнеханов белән компания президенты Шузо Кайхори имзалады.