Казанда Гимнастика үзәге ачылды

Бүген Казанда спорт дөньясында ике тантана билгеләп үтелә, шул уңайдан, Гимнастика үзәге абруйлы кунакларны кабул итте. Сөенечле вакыйгаларның беренчесе, илдә бүтән тиңнәре булмаган Гимнастика үзәгенең рәсми төстә ачылышы булса, икенчесе, шушы үзәктә 16 ноябрьгә кадәр дәвам итәчәк нәфис гимнастика буенча Россия чемпионаты һәм Кубогы ярышларының тантаналы ачылышы белән бәйле. Чарада Татарстан Республикасы Президенты Рөстәм Миңнеханов, Бөтенроссия нәфис гимнастика федерациясе президенты Ирина Винер-Усманова, ТР Яшьләр эшләре, спорт һәм туризм министры Рафис Борһанов, ТР Нәфис гимнастика федерациясе президенты Гөлнара Сергеева, Россиянең атказанган тренеры, Халыкара федерациянең техник комитет президенты Наталья Кузьмина, Гимнастика үзәге директоры Лилия Шәфиева катнашты.

“Бүген Россия спорты тарихында - үзенчәлекле вакыйга. Гомуми мәйданы 20 мең квадрат метр булган мәһабәт спорт комплексы үз ишекләрен ачып җибәрә. Универсиада алдыннан биредә тәүге дәрәҗәле ярышлар үткәрелә”, - дип сәламләде Рөстәм Миңнеханов тантанада катнашучыларны. Ирина Винер-Усманова исә, үз чиратында, Россия гимнасткаларының дөнья күләмендә иң көчле булып танылулары уңаеннан, үзен бик бәхетле тоюын белдерде. “Олимпиадада безнең гимнастика осталарының өметләребезне аклап, без фаразлаган барлык медальләрне отуы бик куандыра. Бу Олимпия уеннарында соңгы медальләр иде һәм без аларны кулыбызга төшердек. Безнең өчен ил көч биреп торды һәм без моны булдырдык”, - диде.

Ачылыш тантанасында нәфис гимнастика буенча ил горурлыгы булган гүзәл затларга: күп тапкыр Ауропа һәм дөнья чемпионы, нәфис гимнастика буенча 2008 һәм 2012 елларда аерым ярышта Олимпия чемпионы исемен яулаган Евгения Канаева, спорт карьерасын 2008 нче елда төгәлләгән Россиянең атказанган спорт мастеры Татьяна Горбунова, 2012 нче Олимпия уеннарының көмеш призеры Дарья Дмитриева, нәфис гимнастика буенча I Олимпия яшүсмерләр уеннарының абсолют чемпионкасы Александра Меркулова, 2012 нче елгы Олимпиаданың төркемле көрәштә чемпионкасы Ульяна Донскова һәм башкаларга да сүз бирелде. Аларның һәммәсенә истәлеккә чәчәк бәйләме һәм картина бүләк ителде. Гимнастика йолдызлары Татарстан Президентына мондый җылы кабул итү өчен рәхмәт сүзләрен ирештерде.

Төркемле күнегүләр буенча ярышларда илнең 30 төбәгеннән 6 шар кешедән торган 32 команда чыгыш ясый. Россия Кубогын уйнатуда 13 гимнастка катнаша. Россия чемпионатында төркемле күнегүләрдә Татарстан данын республика җыелма командасын тәшкил итүче Идел буе физик тәрбия һәм спорт академиясе студенткалары яклаячак. Команданы Россиянең атказанган тренеры Валентина Иваницкая әзерләгән.

Гимнастика үзәге составы һәм җиһазланышы ягыннан Ауропа күләмендә иң югары дәрәҗәдәге спорт объекты. Универсиададан соң ул Идел буе дәүләт физик тәрбия, спорт һәм туризм академиясенең, шулай ук Казан балалар-үсмерләр спорт мәктәпләренең уку-тренерлык базасына әвереләчәк. Биредә шулай ук Россиянең яшүсмерләр җыелма командасы да шөгыльләнер дип көтелә.

Әйтергә кирәк,спорт ярышлар белән беррәттән, “Казан 2013” Башкарма дирекциясе” эшенең дә нәфис гимнастика буенча чаралар үткәрүдәге әзерлеге сыналачак. Ярышларны тамаша кылырга теләүчеләр өчен www.kassir-kazan2013.ru сайтында хәзердән үк, Универсиада 2013 спорт программасы тарафыннан каралган билетларга заказ бирергә була. Аларның бәясе 240 сумнан 300 сумга кадәр тибрәлә.