Татарстан Президенты Яңа Чишмәдә яңа бассейн ачты

Бүген ТР Президенты Рөстәм Миңнеханов Яңа Чишмә муниципаль районында булды, анда ул Яңа Шишмә авылында яңа спорт объекты – “Жемчужина” йөзү бассейны ачылышы тантанасында катнашты.

15 меңнән артык халкы булган (аларның 5 меңе район үзәгендә яши) район өчен бассейн ачылышы - әһәмиятле һәм көтеп алынган вакыйга. Яңа Чишмә районы ДЮСШ җитәкчесе Ольга Быкова сөйләвенчә, аны төзү турында карар җирле халыкның соравы буенча кабул ителгән. Объект бер ел эчендә төзелгән, аның бәясе – якынча 150 миллион сум. Төп чыгымнарны “Татнефть” компаниясе үз өстенә алган, кайбер өлешен – ТР Хөкүмәте.

О.Быкова сүзләренчә, объектны яшәтүгә чыгымнарның 50 процентын муниципаль бюджет үз өстенә ала. Калган 50 процентын коммерцияле эшчәнлек хисабына тәэмин итү планлаштырыла. Балалар һәм олылар өчен ике бассейннан тыш, монда стоматология, медицина һәм массаж кабинетлары, сауна, кер юуу урыны, бильярд өчен зал бар. Бассейн сәгатенә 50 кешене кабул итә ала (36 - олылыр һәм 14 - балалар).

Тантаналы чарада чыгыш ясаганда, ТР Президенты бүген спорт комплексларының бөтен республика буйлап ачылуын билгеләде. “Без 10 көн элек Түбән Камада булдык, ясалма кыр һәм уен мәйданчыклары белән урам спорт комплексын карадык. Бер елдан без һәр шәһәрдә һәм районда шундый бер комплекс төзиячәкбез, дип уйлыйм. Милләт сәламәтлеге – ул төп бурыч”, - дип ассызыклады Рөстәм Миңнеханов.

Ул шулай ук бу юнәлештә эшнең сизелерлек нәтиҗә бирүен билгеләде.

ТР Президенты яңа бассейн Яңа Чишмәдә үз районын гына түгел, ә Татарстанны һәм Россияне танытырлык спортсменнар тәрбияләргә ярдәм итәр, дигән өметен белдерде.

Бүләк буларак, Рөстәм Миңнеханов “Жемчужина”га кирәкле җаиһазлар алу өчен, 100 мең сумлык сертификат тапшырды.

Соңыннан ТР Президенты һәм тантанада катнашучылар яңа объектны карадылар. Бильярд залында Рөстәм Миңнеханов һәм “Татнефть” ААҖ генераль директоры Шәфәгать Тәһаутдинов партия уйнап алдылар. Соңыннан кунаклар бассейнны карадылар, анда синхрон йөзү буенча балалар командасыннан яшь спортсменкаларның чыгышларын күзәттеләр.