Инвалидларга үтеп керә алу мөмкинлеге күрсәтелгән интерактив карта әзерләнә

Бүген ТР Министрлар Кабинетында республика муниципаль берәмлекләре белән видеоконференция рәвешендә уздырылган брифингта Татарстанда инвалидлар өчен каралган уңайлыклар, аларга бәйле вазгыять турында сүз барды.

Аерым алганда, шушы мәсьәләләр буенча ТР хезмәт, мәшгульлек һәм социаль яклау министры урынбасары, Казан каласы буенча социаль яклау идарәсе башлыгы вазифаларын башкаручы Ирина Просвирякова, ТР сәламәтлек саклау министры урынбасары Сергей Осипов һәм ТР буенча медицина-социаль экспертизасы Баш бюросы җитәкчесе Ригель Низамов аңлатма бирде.

И.Просвирякова сүзләренчә, хәзерге вакытта республикада инвалидлар өчен 102 социаль учреждение эшли: инвалидларны тернәкләндерү буенча 8 үзәк, мөмкинлекләре чикле балалар һәм үсмерләрне тернәкләндерү өчен махсуслаштырылган 13 үзәк, картлар һәм гарипләр өчен 28 интернат-йорт, 5 психоневрологик интернат, акыл ягыннан зәгыйфь балалар өчен 2 интернат-йорт, халыкка социаль хезмәт күрсәтү буенча 45 үзәк (18 социаль-тернәкләндерү бүлеге һәм өйдә социаль хезмәт күрсәтә торган 51 бүлек) һәм Кама Аланында заманча медик-социаль технологияләр кулланып тернәкләндерү үзәге.

“Һәркем үтеп керә алырлык мохит” программасына (аны гамәлгә ашыруга быел республикага 659,9 млн. сум бүлеп бирелгән) былтыр 17 муниципаль берәмлек кушылган булса, быел инде 45се дә аның буенча уңайлыклар булдыра, дәүләт һәм республика программаларыннан тыш, муниципалитетлар да үз программаларын гамәлгә кертә. Шулай ук 35 мәктәптә инвалид балалар да иркен үтеп йөри алырлык шартлар тудырылды, аларның 6сы – Казанда, диде ул. Гомумән алганда, инвалидларга көндәлек тормышта 8 өлкә кагыла: социаль яклау, сәламәтлек саклау, мәгариф, спорт, мәдәният, элемтә һәм мәгълүмат, торак, транспорт.

Хәзерге вакытта Татарстанда 326 мең инвалид кеше исәпләнә, аларның 14 меңләбе – балалар, тагын 5,7 меңе – коляскада гына хәрәкәт итә алган инвалид, 9 меңләбе сукыр яки бик начар күрә, 5 меңләбе – ишетү органы зәгыйфь һ.б.

Татарстанда инвалидларның тормышын җиңеләйтү йөзеннән гамәлгә ашырыла торган “Һәркем үтеп керә алырлык мохит” программасы буенча уңайлыклар булдырыла бара, алар, паспортлаштырылып, интерактив картага теркәлә тора – моны ТР Элемтә һәм мәгълүматлаштыру министрлыгы әзерләгән. Картаның базасы бар, шуңа күрә, ул озакламый гамәлгә кертелер, ди И.Просвирякова. Эшне җиңеләйтү максатыннан, муниципалитетларда шушы объектларны паспортлаштыруда катнашкан эшче төркемнәр өчен дәресләр уздыру күздә тотыла.

Объектлар исә 3 төрле итеп карала: теләсә нинди категория инвалидлар тулысынча үтеп йөрерлек, ягъни катларына да кереп булырлык мохит, өлешчә кереп булырлык (монысы, гадәттә, беренче катларда нинди дә булса хезмәт күрсәтү урыннарында) һәм шартлы үтеп йөрерлек. Хәзерге вакытта спорт объектларының күпчелеге, социаль яклау учреждениеләре, Казан циркы, Зур концерт залы, Камал һәм Тинчурин театрлары, РКБ, ДРКБ, МКДЦ, муниципаль берәмлекләрдә район үзәк хастаханәләре, Казан һәм Чаллыдагы сугыш ветераннары госпитальләре инвалидлар өчен уңайлы итеп корылган һәм шушы юнәлештә метрополитенда, шәһәр урамнарында эш дәвам иттерелә.

С.Осипов исә, былтыр инвалидлыкка чыгучылар, 2010 елдагы белән чагыштырганда, 8,6 процентка кимеде, хезмәткә яраксызлар арасында инвалидлыгын тану да 6,8 процентка азрак булды, беренче тапкыр инвалид дип танылучылар да 13,3 процентка азрак, диде.