ТР Премьер-министры Илдар Халиков РФдә Вьетнам Социалистик Республикасының Гадәттән тыш һәм Тулы вәкаләтле илчесе Фам Суан Шон белән очрашты

Бүген ТР Премьер-министры Илдар Халиков РФдә Вьетнам Социалистик Республикасының Гадәттән тыш һәм Тулы вәкаләтле илчесе Фам Суан Шон белән очрашты.

Очрашу ТР Хөкүмәт Йортында үтте.

Очрашуда яклар Вьетнам һәм ТР арасында товар әйләнешен арттыру, мәдәни һәм фәнни элемтәләрне ныгыту мәсьәләләре турында сөйләштеләр. Сөйләшү барышында ТР Хөкүмәте башлыгы Илдар Халиков уртак хезмәттәшлек өчен иң өстенлекле юнәлешләрне атады, бу, аерым алганда, машина һәм суднолар төзелеше, нефть химиясе, шулай ук мәгариф өлкәсе.

“КАМАЗ” ААҖ белән хезмәттәшлек итү һәм аның продукциясен алга җибәрү, “Горький исемендәге Яшел Үзән заводы” ААҖ катнашында суднолар төзелеше өлкәсендә уртак проектларны тормышка ашыру ниятләнә.

РФдә Вьетнам Социалистик Республикасының Гадәттән тыш һәм Тулы вәкаләтле илчесе Фам Суан Шон белдерүенчә, аның Татарстанга сәфәренең төп максаты – төрле өлкәләрдә хезмәттәшлекне үстерү.

Исегезгә төшерик, кичә, 27 нче ноябрьда, Фам Суан Шон җитәкчелегендә Вьетнам делегациясе КФУда булды, анда таныштыру сәфәрләрен оештыру мөмкинлекләре, укытучылар белән алмашу, КФУда Вьетнам Социалистик Республикасы Көннәре уздыру турында сөйләшенде.

Очрашуда Татарстан ягыннан Федераль миграция хезмәтенең ТР буенча идарәсе башлыгы Сергей Чепуштанов, ТР Премьер-министрының тышкы икътисади эшчәнлек буенча ярдәмчесе Альфред Закиров, РФ Чит ил эшләре министрлыгының Казандагы вәкиле Радик Вахитов, ТР сәнәгать һәм сәүдә министры урынбасары Рашат Фәттахов һәм башка рәсми затлар ктанашты.