Рөстәм Миңнеханов: “Татарстан Чехия бизнесының республика территориясендә эшләве белән кызыксына”

Чехия компанияләре технологик яктан һәм фәнни казанышларга нигезләнгән булуы белән аерылып тора. Татарстан Чехия бизнесының уртак проектлар кысаларында һәм үз производстволарын булдырып республика территориясендә эшләве белән кызыксына. Бүген Чехия сәнәгать һәм сәүдә министры Мартин Куба белән очрашуда ТР Президенты Рөстәм Миңнеханов шулай дип белдерде. ТР Хөкүмәте йортында узган очрашуда әлеге илнең эшлекле даирә вәкилләре, Сәүдә-сәнәгать палатасы әгъзалары һ.б. катнашты.

Рөстәм Миңнеханов Россия белән Чехия арасындагы икътисади, сәнәгать һәм фәнни-техник хезмәттәшлек буенча Хөкүмәтара комиссиянең 8 нче пленар утырышын уздыру урыны итеп Казанны сайлаулары өчен Чехия сәнәгать һәм сәүдә министры Мартин Куба белән РФ төбәкләр үсеше министры Игорь Слюняевка рәхмәт белдерде. Аның сүзләренә караганда, әлеге вакыйга Россиянең бер төбәге буларак Татарстанга Чехия белән багланышларда тагын бер адым алга атларга ярдәм итә. “Без бу вакыйганы Татарстан мөмкинлекләрен ике республиканың уртак проектларын гамәлгә ашыруда һәм Чехия бизнесын Россия базарына чыгаруда мәйдан итеп күрсәтү өчен файдаландык”, - ди Рөстәм Миңнеханов.

Татарстан башлыгы, гомумән алганда, Татарстан-Чехия мөнәсәбәтләре үсешен, уртак проектларны гамәлгә ашыруның барышын уңай бәяләде. Бүгенге көндә мондый проектлар авыл хуҗалыгы, машина төзелеше, фармацевтика, төзелеш өлкәләрендә тормышка ашырыла. Рөстәм Миңнеханов IT-өлкәдә дә хезмәттәшлек вариантларын билгеләргә тәкъдим итте. Ул бу атна башында Казанда Россиядә беренче Нанотехнологияләр үзәгенең ачылуын искәртеп, уртак фәнни проектларны гамәлгә ашырганда безнең галимнәр, белгечләр әлеге үзәк мөмкинлекләрен дә файдалана алыр иде, дип белдерде.

Мартин Куба, үз чиратында, Чехия ягының Татарстан-Чехия уртак проектларына ярдәм итәргә әзер булуын белдерде. Министр Рөстәм Миңнехановны Татарстанның эшлекле даирә вәкилләре белән берлектә Чехиягә чакырды. Аның фикеренчә, җавап сәфәре ике республика арасындагы партнерлык мөнәсәбәтләрен тагын да ныгытырга, Чехия бизнесменнарына Татарстанның икътисади мөмкинлекләрен презентацияләргә юл ачачак. Яклар Татарстан эшлекле делегациясенең җавап сәфәрен 2013 елның икенче кварталында оештырырга килештеләр.

Мартин Куба нанотехнологияләр өлкәсендәге хезмәттәшлекне кызыклы һәм перспективалы юнәлеш дип саный. Ул киләсе елга сәфәр вакытында Татарстан делегациясе составына нанотехнологияләр белән шөгыльләнүче фән әһелләрен, студентларны да кертергә тәкъдим итте. Бу идеяне хуплаган Рөстәм Миңнеханов Татарстан белән Чехия вузлары арасында хезмәттәшлеккә, технологияләр, студентлар алмашуга кагылышлы килешү әзерләргә тәкъдим итте.

Чехиянең эшлекле даирә вәкилләре бүгенге очрашуда Татарстанда гамәлгә ашырыла һәм планлаштырыла торган уртак проектлары хакында сөйләде. Чехиянең экспорт банкы вәкиле, мәсәлән, банк җитәкчелегенең Татарстан белән хезмәттәшлек потенциалын югары бәяләвен, республикада бизнесын оештырырга ниятләгән чех компанияләренә ярдәм итәргә әзер булуын җиткерде.

Рөстәм Миңнеханов белән Мартин Куба шулай ук туризм, кунакханә бизнесы һәм сәүдә өлкәләрендә багланышларны көчәйтү мөмкинлекләрен карады.