Илдар Халиков Казан Кремлендә Россия Федерациясе һәм Татарстан Республикасы дәүләт бүләкләрен тапшырды

Бүген Казан Кремлендә Татарстан Премьер-министры Илдар Халиков Россия Федерациясе һәм Татарстан Республикасы дәүләт бүләкләрен тапшырды. “Татарстан күп еллар дәвамында сәнәгать, дәүләт һәм муниципаль идарә өлкәсендә лидер булып тора. Без ел саен тапшырган бүләкләр ТР һәм РФ уңышлары өчен хезмәт итүнең ачык дәлиле”, - дип билгеләп үтте Илдар Халиков тантаналы чараны ачып.

Ул традиция буенча агымдагы елның кайбер нәтиҗәләренә тукталды. “Бу ел күп кенә коллективлар өчен уңышлы булды. Ул базарда катгый көндәшлелек шартларында да иң яхшы сыйфатны, хезмәтчән булуны һәм профессиональлекне күрсәтергә сәләтле булуны дәлилләде. 2012 елның гыйнварыннан сентябренә кадәр тулай төбәк продукты күләмен 1 трлн. сумннан арттыра алдык. Кайчандыр бу ирешә алмаслык күрсәткеч иде, - дип белдерде Премьер-министр. – 2011 ел нәтиҗәләре буенча Татарстан РФ дә тулай төбәк продукты күләме буенча 5 нче урынны алды. Республика 14 нче урында иде, әмма республика предприятиеләре һәм учреждениеләре хезмәте бу күрсәткечләргә ирешү мөмкинлеге бирде. 9 ай нәтиҗәләре буенча Татарстан РФ субъектлары арасында сәнәгать продукциясе буенча 6 урынны алды. Бу уңышка ирешүдә республика нефтьчеләренең, машина төзүчеләрнең һәм авиаторларның өлеше зур”.

Илдар Халиков бүген бүләкләнүчеләр арасында үз һөнәре геройлары күп, алар көн саен кешеләрне коткарганда үз гомерләрен куркыныч астына куя, кемдер авиация комплексында, машина төзелеше өлкәсендә геройларча хезмәт куя, дип билгеләп үтте.

Республика Хөкүмәте җитәкчесе бүләкләнүчеләргә һәм аларның гаиләләренә матур мизгелләре күп булуын теләде. “Сезгә хезмәтегез өчен рәхмәт белдерәм һәм бүгенге вакыйга белән котлыйм”, - диде ул һәм бүләкләр тапшырды.

Бүген Илдар Халиков барлыгы 56 кешегә бүләк тапшырды. Аларның 18 е РФ дәүләт бүләкләренә лаек булды. Аерым алганда, 2 атна дәвамында “Булгария” теплоходы һәлакәте нәтиҗәләрен бетерүдә катнашкан Казанның 2 нче зональ эзләү-коткару отряды коткаручысы Марат Мәгъдиевка “Батырлык өчен” медале тапшырылды. “КАМАЗ” ААҖ заводы слесаре Юрий Казанцев Дуслык ордены белән бүләкләнде.

ТР Министрлар Кабинеты каршындагы “Ту-324 самолеты төзелеше белән идарә итү төркеме” ДУ директоры Назир Киреев II дәрәҗәдәге “Ватан алдындагы хезмәтләре өчен” орденына лаек булды.

ТР Балык Бистәсе районыннан килгән Барановлар гаиләсе “Ата-ана даны” ордены белән бүләкләнде. Гаилә башлыгы мәктәптә укытучы, ә хатыны балалар бакчасында тәрбияче булып эшли. Иҗади гаилә республика Премьер-министрына картина бүләк итте.

Шулай ук РФ бүләкләренә лаек булучылар арасында рәссам, “Россия рәссамнары берлеге” бөтенроссия иҗади иҗтимагый оешманың ТР дагы бүлеге рәисе Зөфәр Гимаев та бар. Аңа “РФ нең Атказанган рәссамы” исеме бирелде.

“Фидакарь хезмәте өчен” медале белән бүләкләнүчеләр исемлегендә ТР Президентының Тышкы элемтәләр департаменты төбәкара хезмәттәшлек һәм ватандашлар белән эшләү секторы мөдире Азат Ахтареев, КДМУ психиатрия һәм наркология кафедрасы профессоры Давыд Менделевич, Казан гарнизон хәрби суды рәисе Эдуард Сафонов, Россия Миграция хезмәтенең ТР буенча Идарәсе чит ил гражданнарын теркәү бүлеге җитәкчесе Әнәс Шәрипов та бар.

“ТРның Атказанган мәдәният хезмәткәре” исеме “Татмедиа” ААҖ филиалы – “Мәдәни җомга” газетасы редакциясенең хатлар һәм социаль мәсьәләләр бүлеге мөхәррире Сөембикә Кашаповага бирелде.

Тантаналы чара истәлеккә фотога төшү белән тәмамланды.