Татарстанда күп балалы гаиләләрдән җир кишәрлекләрен алуга 21092 гариза алынган

Татарстанда күп балалы гаиләләр җир алу өчен 21 меңнән артык гариза биргән. Бу хакта бүген ТР Хөкүмәт йортында узган республика киңәшмәсендә ТР җир һәм милек мөнәсәбәтләре министры Азат Хамаев белдерде. Киңәшмәне Татарстан Президенты Рөстәм Миңнеханов үткәрде, анда шулай ук ТР Премьер-министры Илдар Халиков та катнашты.

Татарстанда барлыгы 23 меңнән артык күп балалы гаилә бар, дип билгеләп үтте А.Хамаев. Бүген шәһәр округларын исәпкә алмыйча күп балалы гаиләләрнең 83 проценты җир алды дип белдерде ул.

Рөстәм Миңнеханов мондый хисапны тәнкыйтькә тотты. Аның сүзләренә караганда, Казан һәм республиканың башка эре шәһәрләре дә исәпкә алынырга тиеш, без шулай итеп кенә сезнең хезмәт нәтиҗәсен күрә алабыз”, - диде республика башлыгы Азат Хамаевка мөрәҗәгать итеп. Казаннан кала республикада күп балалы гаиләләргә җир участогы бирү проблемасы булырга тиеш түгел, дип ассызыклады ул.

А.Хамаев мәгълүматларына караганда, Татарстан башкаласында Казанда күп балалы гаиләләр җир участогы алу өчен 4209 гариза тапшырган. 558 гаилә Каймар авылында тәкъдим иткән җир участокларыннан баш тарткан, ә 364 гаилә риза булган. Моннан тыш, Казанда яшәүчеләр өчен ТР Лаеш районы Сокура авылында җир участоклары алу мөмкинлеге бар.