Татарстан Президенты Истанбул мэры белән очрашты

Төркия Республикасына эш сәфәре кысаларында бүген Татарстан Президенты Рөстәм Миңнеханов Истанбул мэры Кадыйр Топбаш белән очрашты.

Татарстан Президенты Кадыйр Топбашка Истанбулга татарларга булган игътибар өчен рәхмәт белдерде. Быел гына да Төркиянең әлеге чал тарихлы каласында татарларның милли бәйрәме Сабан туе гөрләп узды. Татар шагыйре Габдулла Тукай исемен йөрткән паркта аның истәлегенә һәйкәл ачылды. “Сез татар милләте өчен эшләгән кадәр беркем эшләми”, -дип мөрәҗәгать итте мэрга Татарстан башлыгы.

Рөстәм Миңнеханов Истанбул мэрын Казанда “Истанбул” паркының ачылыш тантанасына чакырды. Ул киләсе елның июнендә ачылыр дип көтелә. Кадыйр Топбаш, үз чиратында, Рөстәм Миңнехановка сәфәре өчен рәхмәт җиткереп, Казан безнең өчен кардәш шәһәр, без сезнең Төркиягә булган җылы мөнәсәбәтегезне сизәбез, дип белдерде. Кадыйр Топбаш 2014 елда Казанның төрки дөньяның мәдәни башкаласы вазифасын башкарасын искә төшереп, 2010 елда Европаның мәдәни башкаласы булган Истанбул җитәкчелегенең Казандагы коллегалары белән мондый чаралар уздыру буенча тәҗрибә уратклашырга әзер булуын җиткерде.

Рөстәм Миңнеханов фикеренчә, киләсе елда җәйге Универсиаданы кабул итәчәк Казан 2020 елда җәйге Олимпия уеннарын уздыруга дәгъва итүче Истанбулга заявка кампаниясендә катнашу тәҗрибәсен өйрәтә ала. Бүген ТР Президенты Истанбулда шулай ук “Эфес групп” президенты Алехандро Хименс, “Коч холдинг”ның Идарә рәисе Мостафа Коч, “Ренессанс” холдингы Идарәсе рәисе Эрман Ылыджак белән очрашты.