Илдар Халиков: Татарстан белән Samsung Electronics компаниясе хезмәттәшлеге кысаларында уртак проектлар турында сүз йөртергә мөмкин

Татарстан Республикасы белән Samsung компаниясенең эшлекле элемтәләре ешая һәм хезмәттәшлеге югары дәрәҗәгә күтәрелә. Бу хакта бүген Татарстан Республикасы Премьер-министры Илдар Халиков Samsung Electronics компаниясенең Россия һәм БДБ илләре буенча президенты Джан Санг Хо белән очрашуда белдерде.

ТР Хөкүмәт йортында узган очрашуда ТР Премьер-министры урынбасары – Мәгълүматлаштыру һәм элемтә министры Роман Шәйхетдинов, ТР мәгариф министры Энгель Фәттахов, Казан (Идел буе) федераль университеты ректоры Илшат Гафуров һ.б. катнашты.

Илдар Халиков, кунакларны сәламләп, Татарстан белән Samsung Electronics компаниясенең уртак проектлары бар дип билгеләп үтте. Анда 2012 елның җәендә компания белән Казан федераль университеты арасында фән һәм инновацион эшчәнлек өлкәсендә хезмәттәшлек итү турында имзаланган меморандум, “ТР Электрон Хөкүмәт” проекты өстендә уртак эш алып бару, шулай ук “Иннополис” проекты кысаларында да эш итү дә керә.

Бу барлык җитди юнәлешләр һәм проектлар Samsung компаниясе белән хезмәттәшлек итү ышанычлы һәм стратегик характерда булуын раслый, дип саный Илдар Халиков.

Илдар Халиков республиканың социаль-икътисади үсеше турында сөйләде һәм Татарстанда ИТ-өлкәне перспективалы саныйлар, дип билгеләп үтте.

Очрашу ахырында ТР Премьер-министры Samsung компаниясе вәкилләре белән югары технологияләр паркына юнәлде, анда алар өчен ИТ-өлкәсе проектарын тәкъдим итү оештырылган.