Рөстәм Миңнеханов: "Кече һәм урта бизнестан гайре республикабыз үсеше мөмкин түгел"

Татарстанда Кече һәм урта бизнес предприятиеләре ассоциациясе төзелүгә 10 ел. Шул уңайдан бүген “Корстон”да ТР Президенты Рөстәм Миңнеханов катнашында юбилей тантанасы үтте. “Әле кайчан гына ассоциация кечкенә генә берләшмә иде. 2002 елда ул оешкан чакта, аның составында нибары 5 фирма иде, беренче җыелышыбызда 20 кешенең катнашуын да яхшы хәтерлим”, -дип искә алды ассоциация президенты Хәйдәр Хәлиуллин. Бүген әлеге берләшмә әгъзалары булган кече һәм урта компанияләр саны 200 дән артып китә. Алар бизнесның барлык өлкәләрен: мәгълүмат технологияләре, юридик хезмәтләрдән алып, җитештерүгә кадәр колачлый.

Ассоциациянең партнерлары саны да меңнән артык. Бүген аның вәкиллекләре Татарстанның шәһәр-районнары белән генә чикләнми, вәкиллекләр Санкт-Петербургта да, Мәскәүдә дә, Ерак Көнчыгышта да, Төмән өлкәсендә дә, БДБ илләрендә, хәтта Франция, АКШ, Бельгия кебек ерак чит илләрдә дә эшли. Хәйдәр Хәлиуллин ассызыклаганча, узган 10 ел вакыт әле үсештәге тәүге баскыч кына. “Алда кече һәм урта эшмәкәрлекне үстерү белән бәйле тагын да зуррак бурычлар тора”, -дип искәтте ул. Быел ассоциация бәйсез чит ил экспертлары тарафыннан Россиядә кече һәм урта бизнес өлкәсендә көчле һәм актив төбәк берләшмәләренең берсе дип табылган. Хәйдәр Хәлиуллин ассоциациянең бүген республиканың иҗтимагый һәм икътисади тормышында актив катнашуын ассызыклап, аның бизнесны үстерүгә кагылышлы мөһим закон чыгару инициативаларын да барлап үтте. Кече һәм урта бизнес предприятиеләре мәнфәгатьләрен кайгытудагы роленә тукталды. “Ассоциациянең соңгы елларда ирешкән уңышларына ТР Президенты Рөстәм Миңнехановның зур ярдәме тиде”, -ди ул.

“Илгә бүгенге көндә урта сыйныф җитми. Ә ул кече һәм урта бизнестан гыйбарәт”, - дип башлады үз чыгышын Президент. Кече һәм урта бизнесның бүген республика икътисадындагы өлеше әле 25 проценттан артмый. Президент искәрткәнчә, цивилизацияле илләрдә бу күрсәткеч 40-60 процентка җитә. “Бу – хәл итеп була торган бурыч. Моның өчен эзлекле рәвештә бу бурычка таба барырга кирәк. Кече һәм урта бизнес үзеннән-үзе генә үсә алмый,төрле шигарьләр белән сөйләү генә дә бурычларны чишми. Кече һәм урта эшмәкәрлек үсеше өчен җитди инфраструктура, ярдәм, алар өчен дөрес уйлап эшләнгән салым ташламалары булдыру кирәк”, -ди ул. Республика башлыгы сүзләренә караганда, технопарк, технополис, Агропромпарк, Иннополис кебек бизнес өчен инфраструктура төзелеше белән бәйле проектларыбыз республикада бурычларны хәл итә. Мондый бурычны, гомүмән, ил күләмендә дә хәл итәргә кирәк, ди республика башлыгы. Рөстәм Миңнеханов ассызыклаганча, урта сыйныф вәкилләре үз-үзләрен тәэмин итәрлек керем алып кына калмый, башкаларны да эш белән тәэмин итә, дәүләтнең нигезен тәшкил итә. “Дәүләт эшлекле , инициативалы, бүгенге көнгә һәм киләчәккә ныклы ышанычлары булган кешеләргә таянырга тиеш. Кече һәм урта бизнес чәчәк атканда, безнең икътисадыбыз да тотрыклы булачак”, -ди Президент.

Рөстәм Миңнеханов үз составында инициативалы, социаль актив эшмәкәрләрне берләштергән ТР Кече һәм урта бизнес предприятиеләре ассоциациясен юбилейлары белән котлап, коллективка ТР Президентының Рәхмәт хатын тапшырды.

ТР Дәүләт Советы рәисе урынбасары Римма Ратникова узган 10 ел вакытның иҗтимагый аң үсеше, бизнес белән хакимият арасындагы мөнәсәбәтләрнең үзгәреше ягыннан әһәмиятле булуына игътибар юнәлтте. “Бизнесның бу чорда социаль җаваплылыгы тагын да артты”, дип саный ул. Парламент рәисе урынбасары кече һәм урта бизнеска кагылышлы бүген гамәлдә булган республика кануннары бизнес белән хакимият мөнәсәбәтләрен көйләүдә, бизнеска финанс ярдәме механизмнарын билгеләү ягыннан зур роль уйный, дип саный. Шул ук вакытта Римма Ратникова законнарның җитешсез якларына игътибар юнәлтеп,ассоциацияне аларны камилләштерүдә бергәләп эшләргә чакырды.

Юбилярны ТР Хөкүмәте исеменнән котлаган Премьер-министр урынбасары -сәнәгать һәм сәүдә министры Равил Зарипов үз чыгышында шушы дистә ел эчендә кече һәм урта бизнестагы сыйфат үзгәрешенә, аларның эшчәнлек өлкәләре киң җәюгә тукталды.

Соңыннан ассоциация әгъзаларына ТР Президентының Рәхмәт сүзе, “Фидакарь хезмәте өчен” медале, ТР Дәүләт Совтының һәм Хөкүмәтенең Рәхмәт хатлары тапшырылды.