И.Халиков РФ вице-премьеры рәислегендә узган бөтенроссия киңәшмәсендә катнашты

Бүген РФ Хөкүмәт Рәисе урынбасары Ольга Голодец видеоконференция режимында үткәргән бөтенроссия киңәшмәсендә сәламәтлек саклауны модернизацияләү, балалар бакчаларында урыннар булдыру буенча төбәк программаларын гамәлгә ашыру һәм грипп эпидемиясе була калса, аңа әзерлек турында сүз барды.

Киңәшмәдә Татарстан Премьер-министры Илдар Халиков катнашты.

Анда 2011-2012 елларда сәламәтлек саклауны модернизацияләү буенча төбәк программаларын гамәлгә куюгаа якынча нәтиҗәләр ясалды. Шулай итеп, РФ сәламәтлек саклау министры Вероника Скворцова белдергән мәгълүматларга караганда, бүгенге көндә федераль үзәк программаларны гамәлгә куюга 292,9 млрд. сум бүлеп биргән. Бу акча сәламәтлек саклау учреждениеләренең матди-техник базасын ныгытуга, яңа стандартлы медицина ярдәме күрсәтүне һәм медицинага мәгълүмат технологияләрен кертүгә юнәлдерелгән.

“Гомумән алганда, динамика бар, барлык төбәкләрдән программаларны гамәлгә кую графикларын үтәүне сорыйбыз”, - дип мөрәҗәгать итте Вероника Скворцова киңәшмәдә катнашучыларга.

РФ Мәгариф һәм фән министры Дмитрий Ливанов мәктәпкәчә балалар учреждениеләренә чират вәзгыяте турында белдерде. Министр белдергән мәгълүматларга караганда, 1 декабрьдә 3-7 яшьлек 5,2 миллион бала балалар бакчасына йөри – бу гомуми санның 84,2 проценты. 504 мең бала чиратта тора. Д.Ливанов белдергәнчә, 2013 елның беренче ярты елында 165 мең бала урынлы булачак, 2013 ел ахырына кадәр – тагын 276 мең.

Ольга Голодец мәктәпкәчә балалар учреждениеләренә урын ихтыяҗын мөмкин кадәр алдан планлаштыру кирәклегенә игътибарны юнәлтте. Ул РФ Мәгариф һәм фән министрлыгына төбәкләр белән бергә 1 мартка кадәр киләчәктә барлык факторларны да исәпкә алып, урын кытлыгы буенча анализ ясауны йөкләде.

Россиянең баш санитар табибы Геннадий Онищенко грипп буенча эпидемия вәзгыяте турында белдерде. Аның сүзләренә караганда, хәзерге вакытта РФ нең 6 субъектында гына күрсәткечләр эпидемия бусагасыннан югары. Мондый түбән саннар - вакцинацияләү нәтиҗәсе. Г.Онищенко мәгълүматларына караганда, Россиядә 37 миллион кеше прививка ясаткан – бу һәр дүртенче россияле дигән сүз.

РФ вице-премьеры Ольга Голодец яңа ел алдыннан Роспотребнадзор һәм төбәк хакимиятләреннән балалар һәм социаль учреждениеләрдә, шулай ук яңа ел бәйрәмнәрендә кешеләр күпләр җыела торган учреждениеләрдә куркынычсызлык мәсьәләсенә игътибар юнәлтүне сорады.