Рөстәм Миңнеханов икътисадны модернизацияләү буенча Совет президиумы утырышында катнашты

Бүген Мәскәүдә РФ Хөкүмәте Рәисе Дмитрий Медведев РФ Президенты каршындагы Россия икътисадын модернизацияләү һәм инновацион үсеш советы президиумы утырышын уздырды.

Утырыш информацион технологияләр һәм телекоммуникацияләр өлкәсендә инновацион үсеш мәсьәләсенә багышланды һәм Россия интернет-гиганты – “Яндекс” компаниясе офисында үтте.

Чарада РФ вице-премьерлары Владислав Сурков һәм Аркадий Дворкович, РФ элемтә һәм гаммәви коммуникацияләр министры Николай Никифоров, РФ финанслар министры Антон Силуанов һәм башка рәсми затлар катнашты. ТР Президенты матбугат хезмәте хәбәр итүенчә, Татарстаннан чарада республика Президенты Рөстәм Миңнеханов, ТР мәгълүматлаштыру һәм элемтә министры Роман Шәйхетдинов катнашкан.

Аерым алганда, утырыш барышында Дмитрий Медведев интеллектуаль милекне саклау өчен институтлар булдыру турында мәсьәләне карап бетерүнең кирәкле, дип санавын белдерде.

Алга таба ул яңа фондның барыннан да элек ничек эшләвен, бер гаризаның, аны рәсмиләштерүнең һәм озата баруның үзкыйммәте нинди булачагын аңлау кирәклегенә ачыклык кертте.

Утырыш барышында медицина өлкәсендә документлар әйләнешен яхшырту турында мәсьәлә күтәрелде.

Россиягә техника кертүгә килгәндә, РФ Хөкүмәте башлыгы бу теманың катлаулы булуын билгеләде. “Сез белгәнчә, безнең таможняда эшне көйләү буенча “юл карта”сы бар, аның тәртибендә эшләячәкбез, анда кагыйдәләрне үзгәртергә тырышачакбыз”, - дип ачыклык кертте ул.

Дмитрий Медведев утырыш барышында 2012 нче ел нәтиҗәләре буенча информацион технологияләр базары күләме 700 миллиард сумнан артып китәчәген, үткән елда моның 650 миллиард сум булуын хәбәр итте. Шулай итеп, базар күләме бер ел эчендә 7 проценттан артык үскән.

Ул “ИТ-сектор үсеше икътисадның барлык тармакларының диярлек үсешен тәэмин итүен ассызыклады. Шуңа күрә ИТ-сектор дәүләт өчен өстенлекле булып калачак”.

РФ Хөкүмәте башлыгы сүзләренчә, агымдагы елда яңа эшләнмәләргә ярдәм итү өчен, 21 миллиард сум акча бүлеп бирү каралган. Якынча 2,5 миллард сум вузларга информацион технологияләр өлкәсендәге алдынгы галимнәрне чакыру һәм сәнәгатьтә уртак проектларны тормышка ашыру өчен, бүлеп бирелгән.