Казанда "Ел җитәкчесе - 2012" конкурсы лауреатларын бүләкләделәр

Бүген Казанның “Корстон” кунакханә-күңел ачу комплексында “Ел җитәкчесе” Республика иҗтимагый конкурсына йомгак ясалды. Иң булдыклы, эшләрендә югары күрсәткечләргә ирешкән җитәкчеләрне Татарстан җитәкчелеге котлады. Бүләкләү тантанасында ТР Президенты Рөстәм Миңнеханов, ТР Премьер-министры Илдар Халиков, ТР Дәүләт Советы Рәисе Фәрит Мөхәммәтшин, Татарстанның Дәүләт киңәшчесе Минтимер Шәймиев, Казан шәһәре мэры Илсур Метшин катнашты. Бәйрәм чарасында ТР Хөкүмәте әгъзалары, республика министрлыклары һәм ведомстволары җитәкчеләре, предприятиеләр, шул исәптән, кече һәм урта бизнес башлыклары, дини конфессия вәкилләре, фән һәм мәдәният, ММЧ учреждениеләре җитәкчеләре бар иде.

“Бүген без уникенче тапкыр елның төп премиясен тапшырабыз. Агымдагы ел фаразланган шөбһәләргә һәм кыенлыкларга карамастан, шактый уңышлы узды. Быел ирешкән нәтиҗәләрдән без бик кәнагать Сәнәгый җитештерү күләмнәренә карап та елның уңышлы узуын әйтеп була. Быел ул 1 триллион 450 миллиард сум булыр дип фаразлана, тулаем төбәк продукты күләме исә 1 триллион 400 миллиард сум булыр дип көтелә”, - дип, Рөстәм Миңнеханов узып баручы елга кыскача күзәтү ясады. Аның сүзләренә караганда, торак, капиталь ремонт мәсьәләләре буенча программалар уңышлы гына үтәлә. Президент быел республикада уртача хезмәт хакы үсешен дә билгеләп үтте. “Болар барысы да реаль икътисади сектор булганда тормышка ашарлык. Безнең мондый куәтебез булмаса, социаль һәм Универсиадага кагылышлы бер проект та тормышка ашмас иде”, - дип, ул барлык җитәкчеләргә рәхмәтен җиткерде.

Рөстәм Миңнеханов директорлар корпусының социаль-икътисади үсеш мәсьәләләрен хәл итүгә керткән өлешен дә ассызыклап үтте. “Татарстанда ихтирамга лаек җитәкчеләр күп, яхшы гына үсеш алучы оешмалар да байтак. Бу оешма коллективларының югары эшчәнлеге тотрыклы икътисадка нигез сала һәм Татарстанның алдынгы төбәкләр рәтендә торуын тәэмин итә”, - дип, ул “Татнефть”, “ТАИФ”, “КАМАЗ”, “Түбән Кама нефтехим” кебек Ачык акционерлык җәмгыятьләренең, “Газпром трансгаз Казан” җаваплылыгы чикләнгән ширкәтләренең социаль программаларны тормышка ашыруга керткән өлешенә басым ясады. Аларга республика Президенты исеменнән истәлекле бүләкләр тапшырылды. “Бүген бизнес алып бару гади түгел, әмма тырышлыгыбыз һәм максатчанлыгыбыз аркасында көндәшлеккә сәләтле булып калабыз”, - дип мөрәҗәгать итте республика башлыгы. “Болгар һәм Свияжскиның ничек торгызылуын, Казанның ничек үзгәрүен күрәбез – боларның барысына да үз кулларыбыз белән ирешәбез”, - дип белдерде Рөстәм Миңнеханов.

Чыгыштан соң Президент оешма җитәкчеләренә дәүләт бүләкләре тапшырды. “Газпром трансгаз Казан” ҖЧҖ генераль директоры Рәфкать Кантюковка Дуслык Ордены, “Татавтодор” ААҖ генераль директоры урынбасары Илдус Фәсхетдиновка “Фидакарь хезмәте өчен” медале тапшырылды. “Новинка” ААҖ генераль директоры Рәфкать Әхтәмовка һәм Нефть продуктларының торбаүткәргеч транспорты Урта-Идел ААҖ генераль директоры Рафис Купкеновка ТР Президентының Рәхмәт сүзе белдерелде.

Бәйгегә 9 номинация буенча йомгак ясалды. Конкурс лауреатлары “Югары көндәшлеккә сәләтлелек өчен”, “Актив инвестицион эшчәнлек өчен”, “Инновацион эшчәнлектәге казанышлар өчен”, “Югары социаль җаваплылык өчен”, “Кадрлар потенциалының актив үсеше өчен”, “Производствоның экологик куркынычсызлыгы өчен”, “Кече (урта) бизнес предприятиесе белән уңышлы идарә иткән өчен”, “Сәламәт тормыш рәвешен формалаштыру өчен”, “Сакчыл производство” методикасын гамәлгә кертү өчен” номинацияләре буенча бүләкләнде. Аларны конкурс комиссиясе рәисе, ТР Премьер-министры Илдар Халиков котлады.

“Бүген елның төп премиясе тапшырыла. Әлеге конкурсның абруе елдан-ел арта, җиңүчеләрне сайлап алу һаман да катлаулана, бу кыенлык, бигрәк тә, уңышлы елларда күзәтелә, ә 2012 нче ел нәкъ менә шундый булды. Җиңүчеләрне сайлап алу бер дә җиңел булмады, идея һәм тәкъдимнәр күп яңгырады, әмма кабул ителгән карарлар агымдагы елның җиңүчеләрен аеруча объектив яктырта дип саныйбыз”, - дип белдерде Хөкүмәт Рәисе. Ул социаль һәм югары технологияле проектларның күпсанлылыгын билгеләп узды. “Әмма Татарстанның визит карточкасы, әлбәттә, спортны үстерүдә”, - диде Илдар Халиков. Чыгышыннан соң ул лауреатларга “Ел җитәкчесе” алтын күкрәк билгеләрен һәм дипломнар тапшырды. Бәйге нәтиҗәләре буенча истәлекле китап дөнья күрәчәк.

Тантана концерт программасы белән үрелеп барды. ТР Дәүләт җыр һәм бию ансамбле артистлары, Казан хореографик училищесы укучылары, Г. Тукай исемендәге Дәүләт премиясе лауреаты Альбина Шаһиморатова һәм башкалар чыгышы бәйрәмгә тагын да ямь өстәде.