Татарстанда табибка бару өчен, кәрәзле телефон аша язылып булачак

Бүген ТР дәүләт һәм муниципаль хезмәтләр порталы һәм сырхауханәләрдәге терминаллар аша 120дән артык филиалы булган 80нән артык дәвалау-профилактика учреждениеләрендәге табибка бару өчен язылырга мөмкин. Киләсе елда февральдән бу сервистан мобиль кушымталар яки инфоматлар аша файдаланырга була. Бу хакта бүген ТР Министрлар Кабинетында узган брифингта ТР Премьер-министры урынбасары – мәгълүматлаштыру һм элемтә министры Роман Шәйхетдинов хәбәр итте.

Ул электрон хезмәтләрнең перспектив үсеш юнәлеше – аларны кәрәзле телефоннардан алу, дип әйтте. “Бурыч- гражданнар өчен кулай вакытта һәм төрле урында электрон хезмәтләрне алуны уңайлы итү”, - дип ассызыклады ведомство башлыгы. Быел iOS операцион системасы белән эшли торган кәрәзле кушымта эшләнгән. Аның сүзләренчә, киләчәктә кәрәзле кушымталар аша автомобильнең кая эвакуацияләнүен белеп, яки машина кую урынын броньлап булачак.

Татарстан халкы инфоматлар белән дә актив эшли – аларга түләүләрнең якынча 60 проценты туры килә.

ТР дәүләт һәм муниципаль хезмәтләр порталы турында сөйләгәндә, Роман Шәйхетдинов бүген анда 138 электрон сервис тәкъдим ителүен билгеләде. Үткән ел белән чагыштырганда, порталга керү 1,5 тапкырга арткан, 2012 нче елда якынча 9 миллион кеше кергән.

Моннан тыш, быел ТРда 16 млн. хезмәт күрсәтелгән (2011 нче елда - 11 млн.).

Быел кертелгән яңалыклар арасында – яңа шәхси кабинет, ул кәрәзле телефон номеры буенча теркәлергә мөмкинлек бирә. Хәзер 240 меңнән артык кулланучының үз шәхси кабинеты бар. Моннан тыш, теркәлгәннәр өчен яңа мәгълүматлаштыру функциясе бар. “Бу сайланган хезмәт буенча автоматик рәвештә мәгълүмат бирүне күзалдында тота торган уңайлы функционал”, - дип ачыклык кертте министр, мәгълүматның элетрон почтага яки SMS-хәбәр аша килә алуын әйтте.

Иң киң таралган автоинформерлар – мәктәптә өлгереш, юлда йөрү тәртибен бозганга, штрафлар, агымдагы керемнәрнең хәле һәм торак-коммуналь хуҗалыгы хезмәтләре буенча хисап балансы.