Рөстәм Миңнеханов: "ТР буенча ЭЭМның Татарстанның тотрыклылыгына һәм социаль-икътисади үсешенә керткән өлеше зур"

Бүген ТР буенча ЭЭМ коллегиясенең киңәйтелгән утырышы булып, министрлыкның узган елдагы эшчәнлегенә йомгак ясады һәм 2013 ел бурычлары турында сүз булды. Утырышта ТР Президенты Рөстәм Миңнеханов, статс-секретарь – РФ эчке эшләр министры урынбасары Игорь Зубов, ТР буенча баш федераль инспектор Рөстәм Идрисов, ТР Дәүләт Советы Рәисе урынбасары Александр Гусев, ТР Премьер-министры урынбасары Әсгать Сәфәров, ТР прокуроры Кафил Әмиров, РФ Федераль куркынычсызлык хезмәтенең ТР буенча идарәсе башлыгы Александр Антонов һ.б. катнашты.

ТР буенча эчке эшләр министры Артем Хохорин төп доклад белән чыгып, узган елдагы һәм хәзерге вазгыятьне яктыртты, ирешелгән уңышлар турында шәрехләде. ТР илдә иң куркынычсыз төбәкләрнең берсе булып кала бирә, дөрес, соңгы елларда ислам дине агымнарының радикаль юнәлешлеләре активлашып, һөҗүмнәре кыюланды һәм профессиональлек ягына авыша төште, дип бәяләде.

2012 елның 12 аенда ТР эчке эшләр органнары тарафыннан ирешелгән уңышларны саклап калу мөмкин булды гына түгел, оператив вазгыять тә сизелерлек тотрыклыландырылды. Республикада җинаятьчелек дәрәҗәсе 100 мең кешегә уртача 1356,3 җинаять туры килә (2011 елда 3,5 меңгә азрак), Идел буе федераль округы буенча ул сан 1566,1не тәшкил итә, РФ буенча – 1609,3. Былтыр Татарстанда барлыгы 51584 җинаять теркәлгән һәм бу 2011 елдагыдан 7 процентка азрак (Идел буе федераль округында – 46681, РФдә - 2302168), шул ук вакытта авыр һәм аеруча авыр җинаятьләр саны 11 процентка кимегән, җинаятьләрне ачу исә 62 процент тәшкил иткән. Көчләү, кеше сәламәтлегенә белә торып авыр зыян салу, талау, урлау, кеше байлыгына куркытып таләп итү юлы белән ия булу, наркотиклар һәм утлы коралның законсыз әйләнешенә бәйле җинаятьләр саны 2011 елдагыдан азрак булган. Татарстан эчке эшләр органнары тарафыннан оешкан җинаятьчел формированиеләре кылган 670 җинаятьне ачкан һәм аларның 427 әгъзасы җинаять җаваплылыгына тартылган.

Мошенниклык очракларының, ә былтыр алар 1166 булган, һәр бишенчесе мобиль элемтә юлы белән эшләнә, андый җинаятьләр белән былтыр гына да 18 млн. сумлык зыян килгән, быел да инде – 1,5 млн. сумлык, дип, министр игътибарны әлеге һ.б. мәсьәләләргә юнәлтте.

ТР буенча ЭЭМның Татарстанның тотрыклылыгына һәм социаль-икътисади үсешенә керткән өлеше зур, тулаем төбәп продуктының (ВРП) 5-6 проценты - хокук сакчылары казанышы-хезмәте, гомумән, хокук сакчылары Татарстанда бик күп файдалы эш башкара – монысы бәхәссез, дип билгеләп үтте ТР Президенты коллегиядәге чыгышында. РФ Эчке эшләр министрлыгын хокук саклау органнарын коралландыруда, Универсиадага әзерлек мәсьәләсендә күрелә торган чаралары өчен рәхмәт белдереп, Казан Универсиадасында куркынычсызлык тәэмин ителеше эшен башкаруда, ә ул Федераль куркынычсызлык хезмәте һәм Эчке эшләр министрлыгы җилкәсенә төшәчәк, хәзер булган нагрузка һәр служба өчен 2-3 мәртәбә артачак, бу Сочи Олимпиадасы алдыннан өйрәнү узу булачак, дип искәртте.

Ведомствода реформа уздыру нәтиҗәсендә, хәзер полицейскийлар җитешмәү мәсьәләсе буенча Президент, участковыйларны “кыскарту” дөрес гамәл түгел, мигрантлар агымы гаять зур, законны санга сукмаучы яшәүчеләр бар, ә аларны кем карый – участковыйлар, ә инде җинаять башкарылгач эш узган була, димәк, шуңа җиткермәс өчен тырышу кирәк, шулай ук юлларда патруль хезмәте тормаса, бездәге ментальлекне исәпкә алып, кагыйдә бозучылар кимемәячәге билгеле, дип кадрлар сәясәтендә фикерен белдерде.

Шулай ук РФ эчке эшләр министры урынбасары Игорь Зубов та сүз алып, ТР буенча ЭЭМ эшчәнлегенә бәяләмә бирде, ТР прокуроры Кафил Әмиров исә хокук сакчыларының хокук бозудагы кыңгыр якларын ачты.

Соңыннан бер төркем хокук сакчысына Президент Рөстәм Миңнеханов ТР Дәүләт бүләкләре, министр урынбасары Игорь Зубов ведомство бүләкләре тапшырды.