Рөстәм Миңнеханов Давоста эшлекле очрашулар һәм сөйләшүләр үткәрде

ТР Президенты Рөстәм Миңнеханов Давоста эшлекле очрашулар һәм сөйләшүләр үткәрде. Европа реконструкция һәм үсеш банкы идарәче директоры Алан Пиллу белән очрашуда банкның республиканың инфраструктура үсеше белән бәйле проектларында катнашуын тагын да активлаштыру, сәнәгать, энергия саклау, торак-коммуналь хуҗалык, кече һәм урта бизнеска ярдәм проектларын гамәлгә ашыруда катнашуы мәсьәләсе каралды. Рөстәм Миңнеханов Алан Пиллуны бизнес-миссия белән Казанга килергә чакырды.

ТР Президентының Philips Electronics компаниясенең дәүләт органнары белән багланышлар буенча җитәкчесе Гарри Хендрикс белән очрашуында инновацион проектлар, Philips компаниясенең шулай ук республикада сәламәтлек саклау объектларын җиһазлау, тикшеренү үзәген һәм җыю производствосын урнаштыру буенча тәкъдимнәре каралды.

Dow Chemical компаниясенең Европадагы, Якын Көнчыгыш һәм Африкадагы башкаручы вице-президенты Хайнц Халлер белән очрашуның темасы компаниянең “Алабуга” МИЗ территориясендәге проектларга инвестицияләр салу мәсьәләсенә багышланды. Шулай ук төзелеш һәм транспорт инфраструктурасын, нефть-газ тармагын үстерү, композит материаллар җитештерү белән бәйле проектлар хакында сүз барды.

Бөтендөнья икътисади форумы кысаларында Рөстәм Миңнеханов Barclays Capital банк инвестиция хезмәтләре бүлеге вице-президенты, Meridian Capital компаниясе рәисе Марк Хольцман белән дә очрашты.