Рөстәм Миңнеханов: Нефть технологияләре өлкәсендә киләчәккә карап эш итәргә кирәк

ТР Президенты Рөстәм Миңнеханов сланецлы нефтьнең, әле ерактагы тема булса да, ләкин киләчәге бар, һәм тиешле технологияләр белән хәзер үк шөгыльләнергә кирәк, дип саный. Бу хакта ул бүген ТР Хөкүмәт Йортында республика ММЧ җитәкчеләре белән булган очрашу вакытында сөйләде.

Ул “Татар-информ” МА хәбәрчесенең ТР Президентының бу мәсьәләне карауда инициатор булып торуы турындагы сорауына уңай җавап бирде.

“Сланецлы нефть – ерактагы тема”, - дип билгеләде ул шул ук вакытта. Бүген “Татнефть” битумлы нефть белән бик җитди шөгыльләнә, аның запаслары бик зур – “классик нефтьнекенә караганда, берничә тапкыр күбрәк”.

“Татнефть” соңгы 5-6 ел эчендә битумлы нефть чыгаруны оештыру өлкәсендә бик күпкә өйрәнгән. “Шуңа күрә сланецлы нефть – бәлки, 50 елдан соң, аның артында киләчәк, һәм безгә дә технологияләр өлкәсендә эшләргә, 50 ел алга карарга кирәк”,- диде Рөстәм Миңнеханов.

Аның сүзләренчә, Россиядә, тулаем алганда, нефть һәм башка чыганаклар күп – илнең запаслары тәртиптә.

Бүген чыгарыла торган нефтьнең сыйфаты турында сөйләгәндә, аерым алганда, югары күкертлелек турында, республика башлыгы: “Нефть яхшы яки начар була алмый. Нефть - ул я бар, я юк”, - дип белдерде.

“Бездә җиңел девон нефте булганда, барысына да ошады (Татарстанда нефть 70 ел чыгарыла – Т-И. искәрмәсе). Бүген күбесенчә карбонатлы, һәм аңа күкертне без салмыйбыз. Моның бер начарлыгы да юк, күкертне чистарту технологияләре бар. Ләкин бу, нефтьнең гомумән булмавына караганда, яхшырак”, - дип саный Р.Миңнеханов.

Бу уңайдан ул “Транснефть” компаниясе белән элемтәләр турында югары фикердә булуын әйтте. “Бу - югары профессиональ команда, алар белән бик оператив эшлибез, безнең бик яхшы мөнәсәбәтләребез, ә Токарев – һәрвакыт чишелешне табарга, ярдәм итәргә әзер булган зур җитәкче”, - диде ТР Президенты.