Владивостокта XXVII Бөтендөнья җәйге Универсиада Уты эстафетасының Россия этабы старт алды

Бүген Владивостокта, Россия студентчылыгы көнендә, XXVII Бөтендөнья җәйге Универсиада Уты эстафетасының Россия этабы старт алды. Владивостоктан турыдан-туры трансляцияне “Россия 24” телеканалы алып бара.
Эстафета Ерак Көнчыгыш федераль университетының яңа кампусыннан – Русский утравыннан башланып, Золотой Рог күперендә тәмамланачак. Владивостокта эстафетаның гомуми озынлыгы 15,5 километрны тәшкил итәчәк.
Универсиада Уты эстафетасы стартында РФ Хөкүмәте Рәисенең беренче урынбасары, Универсиада-2013 кә әзерлек һәм үткәрү буенча оештыру комитеты рәисе Игорь Шувалов, Татарстан Президенты Рөстәм Миңнеханов, Приморье крае губернаторы Владимир Миклушевский, РФ Спорт министры урынбасары Сергей Шелпаков, Россия студентлар спорт берлеге президенты, Халыкара студентлар спорты федерациясенең беренче вице-президенты Олег Матыцин, Казан шәһәре мэры Илсур Метшин, “Казан 2013” Башкарма дирекциясе” оешмасы генераль директоры Владимир Леонов һәм башкалар катнашты.
“Универсиада Уты эстафетасын Россия территориясендә нәкъ менә Студентлар көнендә каршы алуыбыз икеләтә сөенечле. Әлеге Ут спорт, мәгариф һәм мәдәният символы булыр дип уйлыйм. Барлык кешене шушы вакыйга белән котлыйм, илебезгә уңышлар һәм җиңүләр телим”, - дип мөрәҗәгать итте Ерак Көнчыгыш федераль университеты студентларына Олег Матыцин. Нәкъ менә ул Россия җирлегендә Универсиаданың беренче факелын кабызып, аны беренче факел йөртүчегә тапшырды. Элегрәк хәбәр ителгәнчә, бу бәхет “Ак Барс” хоккей командасы капитаны Алексей Морозовка тәтегән иде. Эстафетаның беренче этабын йөгереп үткән Морозов, факелны Универсиада-2013 нең генераль партнеры – “Хендэ Мотор СНГ” компаниясенең маркетинг буенча директоры Алексей Ермиловка тапшырган.
Россия җирлегендә Универсиада Уты Эстафетасының беренче этабында барлыгы 60 факел йөртүче катнашачак. Эстафетаның Владивостоктагы өлешенә бәйрәм хуҗасы – Татьяна нокта куячак. Татьяна Зубарева – Казанда узачак Универсиада-2013 волонтеры, Ерак көнчыгыш федераль университеты студенткасы.
Моннан тыш, бүген Владивостокны Универсиада-2013 хуҗабикәсе Казан белән тоташтыручы телемост та оештырылды. Футбол стадионының төзелеш мәйданыннан Владивосток белән элемтәгә Татарстан Дәүләт Советы Рәисе Фәрит Мөхәммәтшин һәм җиңел атлетика буенча олимпия чемпионкасы Юлия Зарипова чыкты.
Искәртеп узабыз, Универсиада-2013 Уты эстафетасы 2012 нче елның 12 нче июлендә Франциядә старт алган иде. Утның “Седов” җилкәнле судносында диңгез буйлап 45 мең милль озынлыктагы юлда сәяхәт кылуы – тарихи вакыйга.
Эстафетаның Россия этабында факел йөртүчеләр Россиянең иң эре 30 студентлар үзәгенә, абруйлы югары уку йортларына барачак. Эстафета 6 нчы июльдә Казанда төгәлләнәчәк.