Минтимер Шәймиев актер Ринат Таҗетдиновны 75 – яшьлек юбилее белән котлады

Бүген Казанда, Г. Камал исемендәге Татар дәүләт академия театрында Татарстанның һәм Россияның Халык артисты, СССР Дәүләт премиясе һәм Татарстан Республикасының Г. Тукай исемендәге Дәүләт премиясе лауреаты Ринат Гарифҗан улы Таҗетдиновның юбилей кичәсе булып узды.
Юбилей кичәсе К. Тинчуринның “Зәңгәр шәл” спектакленнән алынган өзек белән (“Качкыннар” күренеше) башланып китте. Биредә Шәйхи бабай ролен юбиляр үзе башкарды.
Тамаша залы кунаклар белән тулы иде, алар арасында – Татарстан Республикасының беренче президенты, Татарстан Республикасы Дәүләт Киңәшчесе Минтимер Шәймиев, хатыны белән, ТР мәдәният министры Айрат Сибгатуллин, язучы, шагыйрь, мәдәният, фән, мәгариф һәм милли мәсьәләләр буенча ТР Дәүләт Советы Комитеты рәисе Рәзил Вәлиев, шулай ук актерның хезмәттәшләре һәм популяр җырчылар.
Минтимер Шәймиев юбилярга “Зәңгәр шәл”спектакленең герое – үзен караңгы урманда бәйсез дип санаучы качкын – Шәйхи бабай исеме белән эндәшеп мөрәҗәгать итте. “Аның кебек үк, артист Ринат Таҗетдинов та театр дигән әлеге сихри дөньяда иҗат ирегенә ия” – дип билгеләп үтте ул. Ул Ринат Таҗетдиновның аеруча күренекле рольләрен санап үтте: Ильяс,(Чыңгыз Айтматовның “Гүзәлем Әсәл” әсәре), Ильфат (Т. Миңнуллинның “Монда тудык, монды үстек” әсәре), Кол Гали
(Нурихан Фәттахның “Кол Гали” әсәре), Карандышев ( Островскийның “Бирнәсез кыз” әсәре), Галәветдин ( “Т. Минуллинның “Йөрәк маем” әсәре), Идегәй ( Ю. Сафиуллинның “Идегәй” әсәре), Хәнәви ( З. Хәкимнең “Күрәзәче” пьесасы), Сократ ( М. Гыйләҗевның “Баскетболист” пьесасы) һәм башкалар.
Минтимер Шәймиев барлык тамашачылар исеменнән Ринат Таҗетдиновка аның рольләре һәм зур таланты өчен рәхмәт сүзләрен җиткерде. “Дөресен генә әйткәндә, артист тормышын гади кеше тормышы белән чагыштырып булмый, - дип билгеләп үтте М. Ш. Шәймиев, - артист төрле рольләрне уйнау дәверендә, үзе аша образларны гына түгел, ә әлеге образлар белән бәйле бөтен тормыш вакыйгаларын да үткәрә.”
М. Шәймиев Ринат Таҗетдиновка ТР Президенты Рөстәм Миңнеханов исеменнән рәхмәтләрен белдерде һәм юбилярга “Фиат Альбеа” автомобиленнән ачкычлар тапшырды. “Казанда Универсиадага юл чишелешләре төзелә, урамнар киңәйтелә, шуңа күрә автомобиль бүләк итәбез, Сез йөртә беләсездерме, без белмибез, әмма Сезгә өйрәнергә туры киләчәк”, - дип шаярды Минтимер Шәймиев.
Шуннан соң сәхнәгә күренекле җырчы Салават Фәтхетдинов чыкты. Ул үзенең иҗади бүләген – татар халык җырын бүләк итте.
Юбилярны котлау өчен сәхнәгә язучы, шагыйрь, мәдәният, фән, мәгариф һәм милли мәсьәләләр буенча ТР Дәүләт Советы Комитеты рәисе Рәзил Вәлиев чыкты. “Юбилей кичәсенә килер алдыннан мин Ринат дигән исемнең мәгънәсе турында уйландым, - дип уртаклашты ул. – Әлеге исем “яңа туган” дигән мәгънәне, ә фамилия – “таҗ” мәгънәсен белдерә булып чыкты.” Аның сүзләренә караганда, Ринат Таҗетдинов татар театрының таҗы булып тора да. Ул юбилярны котлады һәм ТР Дәүләт Советы исеменнән истәлекле бүләк тапшырды.
Ринат Таҗетдиновны котлар өчен аның якташлары да килгәннәр – Чүпрәле районы администрациясе вәкилләре. Чүпрәле районы башкарма комитеты җитәкчесе вазыйфасын башкаручы Александр Шадриков актерны бөтен район халкы исеменнән котлады. Алар барысы да һичшиксез аның талантына гашыйк кешеләр.
Юбиляр хөрмәтенә татар җырчылары башкаруында җырлар яңгырады. Алар арасында: Илсаф, Айгөл Хәйри, Искәндәр Биктаһиров, Гөлназ Биктемирова һәм башкалар.
“Әкият” татар дәүләт театры актерлары юбиляр хөрмәтенә күңелле өзек күрсәттеләр. Юбилярны тәбрикләргә Татарстан, Казан, шулай ук Оренбург, Чувашия, Башкортостан театрлары җитәкчеләре килделәр.
Кичәнең ахырында сәхнәгә Г. Камал исемендәге татар дәүләт академия театрының бөтен труппасы чыкты. Хезмәттәшләре исеменнән юбилярны театрның баш режиссеры Фәрит Бикчәнтәев җылы котлады.
Ринат Таҗетдинов үзенең хезмәттәшләренә, гаиләсенә, аның юбилей кичәсенә килгән һәрберсенә рәхмәтләрен белдерде һәм иң беренче чиратта тамашачыларга чиксез рәхмәтле булуын билгеләп үтте. Алардан башка актер иҗатын күз алдына да китереп булмый.