Россия Федерациясенең оборона министры Сергей Шойгу С. П. Горбунов исемендәге Казан Авиация җитештерү берләшмәсенә барып кайтты

“Көтәбез, көтәбез, көтәбез яхшы һәм төрле, ә иң мөһиме – безгә һәм илгә кирәкле самолетларны” шулай дип язып калдырды бүген Россия Федерациясе оборона министры Сергей Шойгу Казандагы С. П. Горбунов исемендәге Казан авиация-җитештерү берләшмәсенең кадерле кунаклар китабында.
Исегезгә төшерәбез, Сергей Шойгу Казанга бер көнлек эш сәфәре белән килде. Татарстан Республикасы башкаласына килү белән РФ оборона министры Татарстан Республикасы Президенты Рөстәм Миңнеханов һәм башка рәсми затлар җитәкчелегендә Казандагы кызыл байрак югары команда танк училищесына барып кайтты. Сергей Шойгу курсантларның казарма биналарын, ял бүлмәләрен, душ бүлмәләрен карап чыкты һәм шулай ук курсантлар ашханәсенә кереп чыкты, монда ул курсантларга тәкъдим ителә торган менюны игътибар белән тикшереп чыкты.
РФ оборона министры барган чираттагы объект - “С. П. Горбунов исемендәге Казан авиация-җитештерү берләшмәсе” ААҖ җыю цехлары.
С. П. Горбунов исемендәге Казан авиация-җитештерү берләшмәсе белгечләре РФ оборона министырлыгы башлыгына махсус һәм стратегик авиация самолетларын төзү барышы турында хәбәр иттеләр. Шулай ук Сергей Шойгу һәм Рөстәм Миңнеханов Ту-214 ОН самолеты бортына күтәрелделәр. (“Ачык күк” программасы буенча эшләнде) .
РФ оборона министры шулай ук С. П. Горбунов исемендәге Казан авиация-җитештерү берләшмәсе цехында тәкъдим ителгән оборона комплексы предприятиеләре күргәзмәсе буйлап йөреп чыкты.