Татарстан Президенты һәм РФ финанслар министры урынбасары Казанда ТРның эре инфраструктура проектлары перспективалары хакында фикер алышты

Бүген Казанда Татарстан Президенты Рөстәм Миңнеханов белән Россия финанслар министры урынбасары Андрей Иванов Кама сәнәгать кластеры, “Алабуга” махсус икътисади зонасы (МИЗ) үсеше һәм Иннополис IT-шәһәре проектларын гамәлгә ашыру мәсьәләләре хакында фикер алыштылар. Киңәшмә Андрей Ивановның Казан IT-паркына эш сәфәре кысаларында узды.

ТР Премьер-министры урынбасары – мәгълүматлаштыру һәм элемтә министры Роман Шәйхетдинов Андрей Ивановка IT-парк эшчәнлеге турында сөйләде, Россия финанслар министры урынбасары шулай ук дата-үзәк һәм бизнес-инкубаторда перспективалы стартаплар белән танышты. Казан IT-паркында эшмәкәрләрне җәлеп итәрлек шартлар тудырылган, дип билгеләп үтте Андрей Иванов. Рөстәм Миңнеханов үз чиратында, хәзер Казан IT-паркы мәйданчыгы 100 процентка тулы, әмма эшмәкәрлекнең андый инфраструктура объектларына элеккечә ихтыяҗ зур,- дип хәбәр итте
ТРда зур инфраструктура проектларын гамәлгә ашыру мәсьәләләре буенча киңәшмәдә ТР Президенты Рөстәм Миңнеханов, вице-премьер – ТР мәгълүматлаштыру һәм элемтә министры Роман Шәйхетдинов, ТР икътисад министры Мидхәт Шаһиәхмәтов, ТР Президентының икътисад мәсьәләләре буенча ярдәмчесе Айрат Хәйруллин катнашты.

Кама сәнәгать кластеры үсеше турында сөйләшкәндә, Андрей Иванов һәм Рөстәм Миңнеханов мондый сәнәгать кластерларында көчле тикшеренү үзәкләрен булдыру кирәклеге турында уртак фикергә килделәр.
ТР Президенты фикеренчә, үзенең үсеш алган сәнәгате белән Түбән Кама нефть химиясе һәм нефть эшкәртү өлкәсендә тикшеренү үзәге өчен җирлек була ала.

Андрей Иванов сәнәгать кластерларын үстерү кысаларында дәүләт белән бизнес бергә булдырачак инфраструктура объектлары исемлегенә тикшеренү үзәкләрен кертүне карарга сүз бирде.

Шулай ук киңәшмәдә “Алабуга” МИЗның киләчәктәге үсеш өстенлекләре турында сөйләшенде. Андрей Иванов сүзләренчә, ТРның МИЗ булдыруда һәм эксплуатациясендәге тәҗрибәсен федераль дәрәҗәдә МИЗга карата норматив-хокук актларын эшләгәндә исәпкә алырга кирәк.

Финанслар министры урынбасарына Иннополис IT-шәһәре проектын гамәлгә ашыру барышы турында да сөйләделәр. ТР Президенты Рөстәм Миңнеханов әйтүенчә, төзелә торган шәһәрнең мөһим элементы - IT-университет. “Университет – ул иң мөһим элемент. Иннополистагы технопарк “акыл ” булганда эшләячәк”, - дигән ышанычын белдерде Р.Миңнеханов.

Шулай ук Казанга сәфәре кысаларында Андрей Иванов төзелә торган футбол стадионында, Су спорт төрләре сараенда һәм Агропромпаркта булырга планлаштыра.