Илдар Халиков: “Җәмәгатьчелек белем бирү системасыннан нәтиҗәле эш көтә”

Балалар бакчаларыннан алып югары уку йортларына кадәрге булган система ахыргы чиктә кеше, гражданинны, профессионалны, республиканың киләчәген тәрбияләргә тиеш. Бүген бу хакта Татарстан Республикасы Мәгариф һәм фән министрлыгының 2012 елдагы эшчәнлек нәтиҗәләре һәм 2013 елга бурычларына багышланган коллегия утырышында ТР Премьер-министры Илдар Халиков билгеләп үтте. Ул бу нисбәттән Яр Чаллының гармоник үсештәге шәхес тәрбияләвен хәбәр итте. Аның фикеренчә, хәзерге вакытта бу системаның республикада тулы канлы эшләмәве проблема булып тора. Мәктәптә югары сыйныфларда профориентация эш алып барылып, яшьләрнең югары квалификацияле белгечләр булып җитешү аларга тормышта үз урынын табарга, яхшы хезмәт хакы алып эшләргә, гаилә корырга мөмкинлек бирә. ТР Мәгариф һәм фән министрлыгының муниципаль берәмлекләрдәге белем бирү торышын чагылдырган рейтинг системасына тукталып, үз чыгышында Илдар Халиков алга таба аны камилләштерү зарурлыгын билгеләп үтте. Рейтинг мөмкин кадәр бүгенге вәзгыятьне яктыртырга тиеш, дип саный ул. “Балалар бакчалары – шәхесне тәрбияләүнең нигезе”, - дип, ул бу тармакка бүгенгегә караганда зуррак игътибар бирелергә тиешлеген ассызыклады. Шулай ук башлангыч һәм урта махсус һөнәри уку йортлары да игътибар сорый. Бүгенге көндә министрлык тарафыннан да, предприятиеләр тарафыннан да әлеге проблеманы аңлау бар. Илдар Халиков фикеренчә, балалар бакчаларына йөрүчеләр бүгеннән үк үзләренең җәмгыятькә, республикага кирәклеген аңларга тиеш. “Хәзерге вакытта югары сыйныфларда профориентлашу эше начар алып барыла. Балаларның һөнәр сайлавы аларның киләчәге белән бәйләнми”, - дип, ул министрлыктан бу юнәлештә механизмнар көтеп калуын белдерде. Төп җаваплылык мәгариф һәм фән министрлыгына йөкләнә. Премьер-министр үз чыгышында шулай ук белем бирү системасына информацион-коммуникатив технологияләр кертүгә республикада зур игътибар бирелүен, авыл мәктәпләренең интернетка тоташтырылуын, әмма көтелгән нәтиҗәләрнең күренмәвен, кайбер районнарда ноутбукларның кулланылмавын белдерде. Шулай ук ата-аналарга балаларның өлгереше турында смсларның җибәрелмәвен дә ул борчылып әйтте. Фактик күрсәткечләр шуның турында сөйли. Аның фикеренчә, министрлыкның бу өлкәдәге сәясәте районнарга барып җитәргә тиеш. Илдар Халиков мәгариф системасына республика җитәкчелеге, хөкүмәт һәм Президент тарафыннан зур игътибар бирелүе – хезмәт хакының артуы, мәгълүмати тәэмин ителеш, мәктәпләрне төзекләндерүнең моңа мисал булып торуын әйтте. Үз чиратында республика җитәкчелеге дә, җәмәгатьчелек, ата-аналар белем бирү системасыннан нәтиҗәле эш көтә. “2012 ел нәтиҗәләре өметләндерә. Бурычлар тулысынча тормышка ашырылган. Безнең тарафтан куелган таләпләр ишетелгән. Киләчәктә дә шундый нәтиҗәләр көтәбез”, - диде Илдар Халиков.