Валентина Матвиенко:”Коррупциягә каршы көрәш буенча Татарстан тәҗрибәсен бөтен Россиягә таратырга кирәк”

Татарстан Республикасы коррупциягә каршы көрәштә Россиядә иң алдынгы регионнарның берсе,һәм Татарстан тәҗрибәсен бөтен Россия буенча таратырга һәм киң кулланырга кирәк.Бүген бу фикерне Россия Федерация Советы рәисе Валентина Матвиенко “РФ субъектларында коррупциягә каршы торуның хокукый һәм институциональ нигезләрен камилләштерү: проблемалар һәм аларны чишү ысуллары"темасына багышланган Бөтенроссия фәнни-гамәли конференция барышында җиткерде.Конференция эшендә Казанда Татарстан Президенты Рөстәм Миңнеханов катнашты.

Конференция кунакларын сәламләп,ТР Президенты Рөстәм Миңнеханов “Конференциядә 33 регионнан вәкилләр катнаша,һәм безне аларның коррупциягә каршы кәрәшү тәҗрибәсе кызыксындыра”,-дип белдерде.

ТР президенты сүзләренчә,республикада коррупциягә каршы торуда зур тәҗрибә тупланган.”Без даими төстә иң заманча тәҗрибәне эзлибез һәм кулланабыз,-диде ул.-Бездә Коррупциягә каршы сәясәт мәсьәләләре буенча ТР Президенты идарәсе булдырылды.”

Валентина Матвиенко үзенең чыгышында хәзерге вакытта “коррупция белән көрәш системалы,принципиаль һәм эзлекле төс ала “,-дип белдерде.Аның фикеренчә,вазыйфаларына карамастан түрәләрне эштән җибәрү һәм җинаять эшләре моңа дәлил булып тора.
РФ Федерация Советы рәисе коррупциягә каршы эшчәнлектә Татарстанның уңышлы тәҗрибәсен искәртеп китте.”Бу тәҗрибә конференциягә килгән 33 регион вәкилләренә дә кызыклы булыр”,-диде ул.
“Татарстанда коррупциягә каршы көрәш буенча төгәл региональ хокукый база формалашкан ,-дип ассызыклады Валентина Матвиенко.- Яңа формалар киң кулланыла ,хакимиятләрнең чиста һәм гадел эшләве тәэмин ителә,бу мәсьәләгә Татарстан Президенты үзе зур игътибар бирә.”

“Без никадәр гаделрәк һәм чистарак эшләсәк,закон бозарга шулкадәр катлаулырак булачак.Менә бу үзе-коррупциягә каршы көрәш булыр,-дип басым ясады ТР Президенты Рөстәм Миңнеханов.